आलमविरुद्धको मुद्दामा फेरि पनि सुनुवाइ स्थगित

काठमाडौं, कात्तिक ५ : कांग्रेसका नेता मोहम्मद अफताव आलमविरुद्ध परेको मुद्दाको सुनुवाइ आज (शुक्रबार) पनि स्थगित भएको छ ।

यसअघि बारम्बार सुनुवाइ स्थागित हुँदै आएको उक्त मुद्दामा आजका लागि पेसी तोकिए पनि महान्यायाधिवक्ता कार्यालयको मागबमोजिम उक्त मुद्दाको सुनुवाइ स्थगित गरिएको सर्वोच्च प्रशासनले जनाएको छ।

सर्वोच्चका न्यायाधीशद्वय डा. आनन्दमोहन भट्टराई र नहकुल सुवेदीको संयुक्त इजलासको कार्यसूचीमा उक्त मुद्दा परेको थियो।

२०७० सालको निर्वाचनमा बम विस्फोट गराइ मानिसहरूको ज्यान लिएको आरोप लागेका आलम हाल केन्द्रीय कारागारमा पुर्पक्षमा छन्।

जिल्ला अदालत रौतहट र उच्च अदालत पाटनले आलमलाई हिरासतमै राखेर मुद्दा प्रक्रिया अघि बढाउन आदेश दिएको थियो। तर उक्त आदेशविरुद्ध आलम सर्वोच्च रिहाइको माग राखेर सर्वोच्च पुगेका थिए।