Kathmandu Press

अत्यधिक वर्षाका कारण भारतको तेलंगानामा १२ को मृत्यु

अत्यधिक वर्षाका कारण भारतको तेलंगानामा १२ को मृत्यु

हैदराबाद, असोज २८ : भारतको तेलंगाना राज्यमा अत्यधिक वर्षापछिका घटनामा परी थप कम्तीमा १२ जनाको मृत्यु भएको छ।

राज्यका विभिन्न ठाउँमा भएका घटनामा परी उनीहरुको मृत्यु भएको प्रहरी अधिकारीहरुले जनाएका छन्।

चन्द्रयाँगुत्ता प्रहरी कार्यालयको दुई ओटा पर्खाल भत्किएर भएको दुर्घटनामा परी १० जनाको मृत्यु भएको छ।  

त्यसैगरी एक जना ४० वर्षीया महिला र उनकी छोरीको इब्राहिमपत्नाममा मृत्यु भएको प्रहरीले जानकारी दिएको छ। उनीहरुको आफ्नै घरको छतले च्यापिएर मृत्यु भएको हो।  

प्रहरी अधिकारीहरुले प्रदेशका धेरै ठाउँमा घर तथा पर्खाल भत्कीने, बाढी पहिरो जानेलगायतका घटनाहरु भएको जनाएका छन्। ती घटनाहरुमा परी अरु धेरै मानिस घाइते भएको विवरणहरु प्राप्त भइरहेको पनि प्रहरी अधिकारीहरुले बताएका छन्।

घटनामा परेकाहरुको उद्धार तथा सहयोगका लागि हैदरावाद लोक सभाका सदस्य असादुद्दीन ओवैसीले अनुगमन गरिरहेको जनाइएको छ।

प्रहरी र उद्धारकर्ताहरुले बाढी, पहिरोलगायतका घटनाका कारण प्रभावित र विस्थापितहरुलाई विभिन्न ठाउँमा स्थानान्तरण गरेका छन्। 

प्रदेशभरीमा औसतमा ९८ दशमलव ९ मिलिमिटर पानी परेको मौसम विज्ञान विभागका अधिकारीहरुले जानकारी दिएका छन्।

प्रकाशित मिति: २०:२९ बजे, बुधबार, असोज २८, २०७७
NTCNTC
Globle IME bankGloble IME bank
प्रतिक्रिया दिनुहोस्