सप्तरीमा छुट्टाछुट्टै घटनामा दुई जनाको मृत्यु

सप्तरी, पुस ३ : सप्तरीको तिलाठी कोइलाडी गाउँपालिका–३ स्थित आँपको बागैचामा छोपिएको अवस्थामा एक बालक मृत भेटिएका छन् । 

स्थानीयवासी रोहित मुखियाका पाँच वर्षीय छोरा आनन्दको शव छोपिएको अवस्थामा भेटिएको प्रहरी नायब उपरीक्षक भुवनेश्वर साहले बताए। खेल्न निस्केका बालक घर नफर्किएपछि बिहीबार बेलुका ९ बजेतिर प्रहरीमा खबर गरिएको थियो।

प्रहरी नायब उपरीक्षक साहका अनुसार ट्रयाक्टरले किचेर बालकको मृत्यु भएपछि चालकले शव आँपको बाँगैचाको पातले छोपेर लुकाइएको प्रारम्भिक अनुसन्धानले देखाएको छ। स १ त ७७५२ नम्बरको ट्रयाक्टरले बालकलाई किचेर मारेको प्रहरीले जनाएको छ। चालक फरार रहेकाले खोजी भइरहेको प्रहरीले जनाएको छ। 

यस्तै, सप्तरीको राजविराज नगरपालिका-१६ बोरियामा शुक्रबार आगलागीमा परेर एक वृद्धको मृत्यु भएको छ। स्थानीयवासी ८५ वर्षीय झलाही यादवको गोठमा सुतेको अवस्थामा अचानक विद्युत् सर्ट भई आगलागी भएको थियो ।  

गोठमा आगलागी हुँदा सोही गोठमा सुतिरहेका यादवको घटनास्थलमा नै मृत्यु भएको प्रहरीले जनाएको छ। राजविराजबाट गएको बारुण यन्त्र र स्थानीयवासीको सहयोगमा आगो नियन्त्रणमा लिइएको थियो। रासस