‘यात्रै यात्राको वर्ष बन्यो–२०२४’ 

बाल्यकालदेखि नै नयाँ ठाउँ घुम्ने सपना बुनेको थिए । त्यो सपनाको सन् २०२४ मा केही हदसम्म भएपनि पूरा भयो । मेरो उमेरको पच्चिसौं वर्ष यसरी यात्राको वर्ष हुनु मेरा लागि एकदमै विशेष थियो । यो वर्ष केवल स्थानहरूको हिसाबले मात्र नभई अनुभव र सिकाइको दृष्टिले पनि महत्वपूर्ण बन्न पुगिदियो । 

नेपालका ६ प्रदेश

पहिला देश अनि विदेश” भन्ने भनाइलाई आत्मसात गर्दै आफ्नो देशका भु-भाग डुलिरहेको मैले यस वर्ष नेपालका ६ प्रदेशमा यात्रा गर्ने अवसर पाएँ । प्रकृति, हिमाल, र भौगोलिक विविधताको नजिक पुग्न असाध्यै रुचाउने मेरो चाहना प्रदेश युवा सम्मेलन (२०२४ ले पूरा गरिदियो । नेपाल युवा परिषद्को आयोजनामा सातै प्रदेशमा कार्यक्रम आयोजना गर्ने क्रममा देशका विभिन्न रमणीय ठाउँको भ्रमण गर्ने अवसर प्राप्त भएको हो । 

बागमती प्रदेश चितवनको माडी पुग्दा आफ्नै प्रदेश भएपनि त्यहाँको वातावरण र प्राकृतिक सुन्दरता मलाई नयाँ अनुभवजस्तै लाग्यो । लुम्बिनी प्रदेशमा नेपालगञ्ज भ्रमण गरें, जुन मेरो लागि नयाँ गन्तव्य थियो ।  कर्णाली प्रदेशमा पहिलो पटक पुगेको मलाई सुर्खेतको काक्रेबिहार र त्यहाँको प्राकृतिक सौन्दर्यले लोभ्यायो । 

कोशी प्रदेशको विराटनगर र इलामको भ्रमण पनि गरेँ । पर्यटकको रोजाईमा पर्ने इलाम हुँदै श्रीअन्तु पुग्दा त्यहाँको चिया बगान र सूर्योदयको दृश्य हेर्दा यो अनुभव स्वर्गीय लागेको थियो । नेपालकै पर्यटकीय राजधानी पोखरामा थकान मेट्नका लागि लेकसाइडको चहलपहलमा डुब्नु जति आनन्ददायी अनुभव अरू बिरलै पाइन्छ।

व्यक्तिगत कारणले सुदूरपश्चिम प्रदेश पुग्न नसके पनि मधेस प्रदेशका बारा, पर्सा, रौतहट र वीरगञ्जमा पुगेर त्यहाँको भौगोलिक र सांस्कृतिक विविधता नजिकबाट हेर्ने अवसर पाएको थिएँ। यसरी ६ वटा प्रदेशको भ्रमण यसबर्ष सम्भव भयो, जसले मलाई मेरो देशलाई अझै राम्रोसँग बुझ्न सघाउ पुर्‍यायो । 

थाइल्याण्डमा १ हप्ता

भारत पछिको मेरा लागि विदेशको पहिलो यात्रा थाइल्याण्ड बन्न पुग्यो। ‘ग्लोबल युथ पार्लियामेन्ट’ को कार्यक्रममा सहभागी हुन मैले थाइल्याण्डको यात्रा गर्ने अवसर पाएँ । युवा र बालबालिकाका क्षेत्रमा सामाजिक कामप्रतिको रुचि राख्ने मलाई ‘द योङ अचिभर्स अवार्ड २०२४’ बाट सम्मानित हुन पाउनु अर्को गौरबको विषय थियो । 

बैङ्कक र को सामेद टापुको भ्रमण रमाइलो मात्र नभई प्रेरणादायी पनि रह्यो । कार्यक्रमकै क्रममा अन्तर्राष्ट्रिय स्तरमा भएका गतिविधिहरूको अनुभव गर्न पाउँदा मलाई धेरै कुरा सिक्ने मौका मिल्यो । विश्वभरका पर्यटकहरूका लागि लोकप्रिय गन्तव्य थाइल्यान्डको शहरी सौन्दर्य र समुद्र किनारमा समय बिताउन पाउँदा यो यात्रा अविस्मरणीय बन्यो।

युरोपका ५ देशमा १८ दिन

युरोप भ्रमण प्रायः सबै नेपालीको रोजाईको गन्तव्य हो । इतिहास, सभ्यता, र विकासको स्रोत मानिएको युरोपमा पहिलो पटक पाइला टेक्दा मैले सपनाको संसारमा पाइला राखेझैं महसुस गरें । नेपाल युवा परिषद्को प्रतिनिधित्व गर्दै ुफ्युचर प्रुफ मास्टरपिस बुटक्याम्पु कार्यक्रममा सहभागिताका लागि म रोमानिया जाने तय भएको थियो।

नेदरल्यान्ड: पहिलो युरोपेली अनुभव

नेदरल्यान्ड मेरो पहिलो युरोपेली देश रह्यो । नेपाल बाट रोमानियाको भिसा प्रक्रिया गर्ने माध्यम नभएकाले पनि मैले नेदरल्याण्डको भिसा लिएँ । आम्स्टर्डाम पुग्दा आधुनिकता र इतिहासको संयोजनले मोहित गरायो । पहिलो रात होटल बुक गर्न नजान्दा महँगो मूल्यमा डर्मिटोरीमा बसेको अनुभव सधैं सम्झन्छु ।  आम्स्टर्डामको व्यवस्थित ट्राम, मेट्रो, र साइकलको चहलपहलले सहरको सुन्दरता झल्काउँथ्यो ।

रोमानिया: संस्कृतिको संगम

रोमानियाको ३ दिनको कार्यक्रममा ४०ं  देशका ७०ं प्रतिनिधिहरूसँग भेटघाट र विचार आदानप्रदान भयो। आफुले युवाका क्षेत्रमा गर्दै आएका कामहरु विदेशी साथीहरुलाई आदानप्रदान गर्न पाउनु मेरा लागि विशेष अवसर थियो। त्यहाँको सांस्कृतिक प्रदर्शन र नेपाली कामदारहरूसँगको भेट रमाइलो लाग्नुका साथै अपनत्वको बोध भएको थियो।

बेल्जियम: शान्त र हरियाली सहर

ब्रसल्सको हरियाली र सफाइले मलाई मोहित बनायो। एक बेल्जियम नागरिक गुइडो रिईसौ ले चिडियाखानाको पास उपहार दिएपछि मैले बेल्जियमको यान्ट्वेर्पमा अवस्थित प्रसिद्ध चिडियाखाना घुम्ने अवसर पाएँ। यान्ट्वेर्पमा प्लस टु पढ्दाकि  बहिनी बिनिसा राय र उनको परिवारसँगको भेट र नेपाली खानाको स्वाद विदेशमा पनि आफ्नोपनको झल्को दिन्थ्यो।

फ्रान्स: सपनाको सहर

प्यारिस, जसलाई “सपना पूरा हुने सहर” भनेर चिनिन्छ। यहाँको आइफेल टावर हेर्दा साँच्चै अद्भुत लाग्यो। आइफेल टावरको दिउँसोको भन्दा पनि रातिको दृश्य हेर्न लायक थियो। लुभ्रे म्युजियम र ऐतिहासिक संरचनाले फ्रान्सलाई झन् आकर्षक बनाएको महसुस भयो।

स्विजरल्यान्डः प्रकृतिको स्वर्ग

जेनेभा, स्विजरल्यान्डको शान्ति र सुन्दरताले मलाई समग्रतामा अचम्मित बनाउनुका साथसाथै आनन्दित तुल्यायो। यहाँको युएन हाउसको भ्रमण र नेपाली राजदूतसँगको भेटघाटले यात्रा विशेष बनायो। स्विजरल्यान्डको पहाडी सौन्दर्य र व्यवस्थित जीवनशैली हेर्दा यो देश साँचिकै स्वर्गजस्तो लाग्यो। स्विजरल्यान्डको बसाइलाई सरल, सहज र सुन्दर बनाउन अङ्कल गोविन्द र आन्टी मनुको भुमिका विशेष रह्यो।   

आकाश छेड, भुइँ नछोड” भन्ने नेपाली उखान मलाई असाध्यै मनपर्छ र व्यवहारमा पनि उतार्ने प्रयत्न गरिरहेको हुन्छु। यस वर्षका अनुभवहरू मेरो सोच र दृष्टिकोणलाई फराकिलो बनाउने कडी बन्नुका साथै सिकाइ र आत्म-आविष्कारको यो वर्ष जीवनकै उत्कृष्ट बन्नपुग्यो। नयाँ वर्ष अझै विशेष बन्ने अपेक्षा सहित नयाँ वर्षको सम्पूर्णमा शुभकामना।