सरकारले राहतको विशेष प्याकेज ल्याउँछ : मन्त्री बडू
महेन्द्रनगर, कात्तिक ६ : न्याय, कानुन तथा संसदीय मामिलामन्त्री दिलेन्द्रप्रसाद बडूले बाढी, पहिरो र डुबानबाट मुलुकले ठूलो क्षति बेहोर्नुपरेको बताएका छन्।नेपाली कांग्रेस कञ्चनपुर...महेन्द्रनगर, कात्तिक ६ : न्याय, कानुन तथा संसदीय मामिलामन्त्री दिलेन्द्रप्रसाद बडूले बाढी, पहिरो र डुबानबाट मुलुकले ठूलो क्षति बेहोर्नुपरेको बताएका छन्।
नेपाली कांग्रेस कञ्चनपुर शाखाले शनिबार बिहान आयोजना गरेको कार्यकर्ता भेटघाटमा उनले प्रधानमन्त्रीले राहत र पुनर्निर्माणका लागि विशेष चासो दिएको बताए। ‘पुनर्निर्माणभन्दा पनि तत्काल राहत पाउनुपर्ने वर्ग किसान हो,’ मन्त्री बडूले भने, ‘योजनाबद्ध ढङ्गले राहत र पुनःस्थापना सरकार लाग्छ।’
बाढी र पहिराबाट भएको क्षतिका कारण पुनर्निर्माणमा ढिलाइ भए पनि राहत प्याकेज तत्काल ल्याइने उल्लेख गर्दै उनले भने, ‘देशभरको क्षतिको अवस्था हेर्दा वैदेशिक सहायता जुटाएर पनि जनताको पीडामा मल्हम लगाउँछौं।’ फरक प्रसंगमा मन्त्री बडूले नेपाली कांग्रेसलाई मुलुक हाँक्ने जिम्मेवारी आएको बताए। ‘मुलुकको सफलता र संविधानको रक्षाका लागि सरकारमा आयौं,’ उनले भने, ‘अहिले हाम्रासामु चुनौतीहरु पनि धेरै छन्।’
नेपाली कांग्रेसका केन्द्रीय सदस्य एवं पूर्वमन्त्री रमेश लेखकले बाढी र पहिराको सबैभन्दा बढी मारमा सुदूरपश्चिम प्रदेश परेको बताए। ‘हामीले पनि प्रधानमन्त्रीज्यूको टोलीसित बाढीपहिरोपीडित क्षेत्रको स्थलगत अनुगमन गर्दा निकै दर्दनाक अवस्था छ,’ नेता लेखकले भने, ‘तत्काल सरकारले राहतको व्यवस्था गर्नुपर्छ।’
किसानलाई राहत र घरबारविहीन भएकालाई छाक टार्ने व्यवस्था मिलाउनुपर्नेमा जोड दिँदै उनले भने, ‘यहाँ भएको क्षति प्रधानमन्त्रीले आफैं हेरेर जानुभएको छ। तत्काल राहत ल्याउन सरकारले पहल गर्नेछ।’