सशस्त्रले जित्यो विराट गोल्डकपको उपाधि

काठमाडौं, वैशाख ५ : विराट गोल्डकपको छैठौं संस्करणको उपाधि सशस्त्र प्रहरीको एपीएफ क्लबले जितेको छ ।

विराटनगरमा रहेको सहिद मैदानमा शनिवार राति भएको फाइनल खेलमा भारतीय टिम पञ्जाब पुलिसलाई १-० गोलले हराउँदै एपीएफले उपाधि हात पारेको हो ।

एपीएफका प्रदीप लामाले खेलको ११ औं मिनेटमा गरेको गोल नै निर्णायक गोल बन्यो । दोस्रो हाफदेखि आक्रामक भएर मैदान प्रवेश गरे पनि पञ्जाबले बारम्बार गोल गर्ने अवसर चुकाउँदा उपविजेतामा सीमित भयो । 

जितसँगै एपीएफले  १५ लाख १५ हजार रुपैयाँ र ट्रफी उचालेको छ । उपविजेता बनेको पञ्जाबले ७ लाख ५१ हजार रुपैयाँ पाएको छ ।