कोरोनाको खोप बनाउने भारतीय कम्पनी सेरम इन्स्टिच्युड अफ इन्डियामा आगलागी   

पुणे– कोरोना भाइरसविरुद्धको खोप बनाइरहेको भारतको महाराष्ट्रमा रहेको ‘सेरम इन्स्टिच्युड अफ इन्डिया’ को कार्यालयमा आगलागी भएको छ ।     
     
लाखौँ लाख खोप उत्पादन गरिरहेको बेला बिहीबार ठूलो आगलागी भएको हो । आगलागीबाट मानवीय क्षति नभए पनि अन्य ठूलो क्षति भएको प्रारम्भिक प्रतिक्रिया सार्वजनिक भएको छ ।     
     
आगो नियन्त्रणका लागि १० ओटा दमकल परिचालन गरिएको थियो । कम्पनीको उत्पादन गृहको चौथो र पाँचौँ तलामा आगलागी भएको जनाइएको छ ।   आगलागीका कारण उत्पादित खोप भने जल्न नपाएको अधिकारीहरूले जनाएका छन् । त्यसैगरी खोप उत्पादन गर्ने ठाउँ पनि सुरक्षित नै रहेको छ ।     
     
एक अधिकारीले भने, ‘आगलागीका कारण कोरोनाविरुद्धको खोप उत्पादन कार्यमा भने कुनै असर परेको छैन ।’  सेरम इन्स्टिच्युड अफ इन्डियाले उत्पादन गरेको खोप नै अहिले भारतमा अभियानका रूपमा लगाइँदै छ ।