रोशीका पाँच स्वास्थ्य संस्थामा निःशुल्क औषधीसहित मानसिक रोगको उपचार हुने

काभ्रे, भदौ २५ : काभ्रे जिल्लाको रोशी गाउँपालिकाले केहि समयमै गाउँपालिकाभित्र सञ्चालित पाँच स्वास्थ्य संस्थामा निःशुल्क औषधिसहित मानसिक रोगको उपचार गर्ने भएको छ।

मानसिक रोगको बारेमा तालिम प्राप्त स्वास्थ्यकर्मी रहेको ५ स्वास्थ्य संस्थामा केही दिनमै मानसिर रोगको निःशुल्क उपचार सुरु गरिने गाउँपालिकाले जनाएको छ।

रोशी गाउँपालिका स्वास्थ्य शाखा प्रमुख गंगालाल श्रेष्ठका अनुसार गाउँपालिकाभित्रका स्वास्थ्य संस्थाहरू मध्ये ५ वटा स्वास्थ्य संस्थामा मानसिक रोगको बारेमा तालिम प्राप्त स्वास्थ्यकर्मी रहेकाले ति स्वास्थ्य संस्थामा मानसिक रोगको उपचार लागिएको हो।

रोशी–५ स्थित सिसाखानी स्वास्थ्य संस्था, वडा नं. ७ स्थित कटुञ्जेबेशी स्वास्थ्य संस्था, वडा नं. ८ स्थित खार्पाचोक स्वास्थ्य संस्था, वडा नं. १० स्थित वाल्टिङ स्वास्थ्य संस्था र वडा नं. ११ स्थित भिमखोरी स्वास्थ्य संस्थामा केही समयमै मानसिक रोगको उपचार सुरू गरिने उनले जानकारी दिए।

औषधिको टेण्डर भइसकेको र सो औषधी आउनेवित्तिकै ती ५ स्वास्थ्य संस्थाहरूमा निःशुल्क औषधिसहित मानसिक रोगको उपचार सुरु गर्ने उनको भनाई छ। पालिकाको अन्य स्वास्थ्य संस्थाहरूमा पनि क्रमशः स्वास्थ्यकर्मीहरूलाई तालिम दिएर मानसिक रोगको उपचारमा बृद्धि गर्दै जाने उनले जानकारी दिए।