नक्कली भुटानी शरणार्थी प्रकरणमा थप १८ जना पीडितको जाहेरी 

काठमाडौं, साउन २९ : नक्कली भुटानी शरणार्थी प्रकरणमा थप १८ जना पीडितले प्रहरीमा जाहेरी दिएका छन् । 

आफुहरुलाई भुटानी शरणार्थी बनाई अमेरिका लैजाने भन्दै ठगी गरेको दाबीसहित पीडितहरुले काठमाडौं उपत्यका अपराध अनुसन्धान कार्यालयमा जाहेरी दिएका हुन्।

आफूहरुबाट १ करोड ८५ लाख ९२ हजार भन्दा भन्दा बढी रकम ठगी गरेको भनेर भिन्नाभिन्नै ३ किटानी जाहेरी दिएका छन्। 

अमेरिका पठाइदिने भन्दै सानु भण्डारी र केशव दुलाल समेतको मिलेमतोमा आफूहरु ठगिएको दाबी सहित जाहेरी पर्न आएको प्रहरीले बताएको छ।

पीडितहरु लमजुङ, सुनसरी, सिन्धुपाल्चोक, गोरखा, ललितपुर, चितवन र काठमाडौंसहितका जिल्लाका छन्।

जाहेरी दरखास्त लगायतका कागजातहरु आवश्यक अनुसन्धान गर्न महाशाखाले जिल्ला प्रहरी परिसर काठमाडौंमा पठाएको जनाएको छ।