मगर संघको स्थापना दिवसका अवसरमा चन्द्रपुरमा सार्वजनिक बिदा

काठमाडौं, फागुन १४ : रौतहटको चन्द्रपुर नगरपालिकाले नेपाल मगर संघको ४१औं स्थापना दिवसकाे अवसर पारेर भाेलि (फागुन १५ गते) का लागि सार्वजनिक बिदा दिएको छ।

नगरपालिकाले आज (आइतबार) एक सूचना जारी गरेर मगर संघको स्थापना दिवसका अवसरमा आफ्नो मातहतका सबै कार्यालय सोमबार बन्द हुने जानकारी गराएको हो।

उपमेयर जयमालाकुमारी चौधरीद्वारा हस्ताक्षरित सूचनामा उल्लेख छ, ‘मगर संघको ४१औं स्थापना दिवसको अवसरमा सोमबार नगरपालिकाका कार्यालय, वडा कार्यालय तथा मातहतका सबै कार्यालयहरुमा बिदा रहने सबैमा जानकारी गराइन्छ।’

उपमेयर चौधरीले संघको स्थापना दिवसका अवसरमा व्यक्तिगत र नगरपालिकका तर्फबाट शुभकामना पनि दिएकी छन्।