बस र अटो रिक्सा ठोक्किँदा रौतहटमा तीन जनाको मृत्यु

रौतहट, भदौ २ : रौतहटको चन्द्रपुर नगरपालिका–२ लच्कामा आज बिहान बस र अटो रिक्सा ठोक्किँदा तीन जनाको मृत्यु भएको छ।

जिल्ला प्रहरी कार्यालयका अनुसार दुर्घटनामा सर्लाहीको बागमती नगरपालिका–२ का ४९ वर्षीय ढकबहादुर लुंगेली मगर, ३९ वर्षीय प्रेम ठाडा मगर र अटो चालक ३९ वर्षीय रवि मगरको मृत्यु भएको छ।

काठमाडौंबाट सर्लाहीका लागि छुटेको बागमती प्रदेश ०३–००१ ख २०१ नम्बरको बस र पूर्वबाट पश्चिमतर्फ आउँदै गरेको प्रदेश २–०२–००१ ह २१०९ नम्बरको अटो आज बिहान ५ बजे चन्द्रपुरको लच्कामा ठोक्किएको प्रहरीले जनाएको छ।

दुर्घटनामा सबिना लुंगेली मगर घाइते भएकी छन्। उनको वीरगञ्जमा उपचार भइरहेको छ। बस चालकलाई नियन्त्रणमा लिएको जिल्ला प्रहरी कार्यालय रौतहटले जनाएको छ।