‘आफूहरूका लागि बस चढ्ने ठाउँ तोकिदिएपछि उपप्राध्यापक आचार्यले आभार व्यक्त गरे’
‘पिक एन्ड ड्रप स्टेसन’ तोकिएबाहेकका स्थानमा सार्वजनिक सवारीसाधन रोक्न निषेध गरियो । यसले विशेषतः फरक क्षमता भएका व्यक्तिलाई कष्टकर हुन पुगेको थियो । किनभने उनीहरू भीडभाड हुने स्टेसनमै पुग्नुपर्थ्याे ।
काठमाडौं, माघ १४ : डा. गोविन्दप्रसाद आचार्य १८ वर्षदेखि प्रदर्शनीमार्गस्थित रत्नराज्य क्याम्पसमा नेपाली विषयका उपप्राध्यापक छन् । कीर्तिपुर बस्ने उनी सुन्धारास्थित आरएनएसी भवन अगाडिसम्म बसमा आउने र त्यहीँबाट बस चढी फर्कने गर्थे ।
धेरैतिर जाने सार्वजनिक सवारीसाधनले यात्रु चढाउने र ओराल्ने ठाउँ हो सुन्धारा, यहाँ सधैँ भीड हुने गर्छ । त्यसैले दृष्टिविहीन आचार्यलाई प्रदर्शनीमार्गदेखि सुन्धारासम्मको पैदल यात्रा कष्टकर थियो । सोमबार पुरानो बसपार्क क्षेत्रमा एउटा बोर्ड राखियो– फरक क्षमता भएका व्यक्तिलाई मात्र चढाउने र ओराल्ने ठाउँ । सोमबारै उपप्राध्यापक आचार्यले सोही ठाउँबाट कीर्तिपुरका लागि बस चढे ।
महानगरीय ट्राफिक प्रहरीले आफूहरूका लागि बोर्ड नै राखिदिएपछि उपप्राध्यापक आचार्य निकै खुसी छन् । आफूले महानगरीय प्रहरी प्रवक्ता सञ्जीव शर्मा दासलाई फोन गरी आभार व्यक्त गरेको पनि उनले बताए । ‘अन्य देशमा फरक क्षमता भएका व्यक्तिका लागि अपांगमैत्री सवारीसाधनको व्यवस्था हुन्छ,’ उनले भने, ‘हाम्रो देशमा सवारीसाधन रोक्ने स्थान समेत थिएन । हाम्रो समस्यालाई मध्यनजर गरी प्रहरी निकायले यो व्यवस्था गरेकामा अत्यन्तै खुसी छु ।’
२२ वर्षीया रोशनी अधिकारी प्रदर्शनीमार्गकै ‘नेपाल ल क्याम्पस’मा अध्ययन गर्छिन् । अनलाइन कक्षा सञ्चालन भएकाले अहिले उनलाई क्याम्पस आउनुपरेको छैन । बालाजु बस्ने उनलाई क्याम्पस आउँदा–जाँदा बस कसरी चढ्ने भन्ने चिन्ता हुन्थ्यो । आफूहरूका लागि ठाउँ तोकिएको खबरले उनी खुसी छन् ।
‘कलेज मात्र होइन, भृकुटीमण्डप क्षेत्रमै अपांग महासंघको कार्यालय छ । समय समयमा भेला, सभा, बैठक हुने गर्छ,’ उनी भन्छिन्, ‘बैठकपछि यातायातका साधनका लागि हामीलाई समस्या थियो ।’
यसरी नै अन्यत्र पनि ठाउँ तोकिनुपर्ने उनी बताउँछिन् ।
‘पिक एन्ड ड्रप स्टेसन’
सन् २०१९ मा काठमाडौं महानगरपालिकाले ट्राफिक जाम कम गराउने उद्देश्यले उपत्यकामा ‘पिक एन्ड ड्रप स्टेसन’ तोकिदियो । तोकिएबाहेकका स्थानमा सार्वजनिक सवारीसाधन रोक्न निषेध गरियो । यसले विशेषतः फरक क्षमता भएका व्यक्तिलाई कष्टकर हुन पुगेको थियो । किनभने उनीहरू भीडभाड हुने स्टेसनमै पुग्नुपथ्र्यो । यो समस्यालाई महानगरीय प्रहरी प्रवक्ता सञ्जीव शर्मा दासले नजिकबाट नियालिरहेका थिए ।
सुन्धारा पुगेर बस चढ्न दैनिक दुईदेखि तीन सयसम्म फरक क्षमता भएका व्यक्तिलाई कठिनाइ भइरहेको उनले महसुस गरे । उनको घरमा पनि फरक क्षमता भएका सदस्य छन् । त्यसैले आफू यस विषयमा अलि गम्भीर हुन पुगेको प्रहरी प्रवक्ता दास बताउँछन् । उनले महानगरीय ट्राफिक प्रहरी महाशाखाका प्रमुख वरिष्ठ उपरीक्षक उमेशराज जोशीलाई फरक क्षमता भएका व्यक्तिलाई ‘पिक एन्ड ड्रप स्टेसन’ तोक्ने सम्बन्धमा प्रस्ताव गरेका थिए ।
पुरानो बसपार्कमा सोमबार बोर्ड राखेदेखि बसहरू त्यहाँ रोकिन थालेका छन् । फरक क्षमता भएका व्यक्तिलाई सार्वजनिक सवारीसाधनमा सहज पहुँचका हेतुले यस प्रकारको सुविधा सुचारु गरिएको वरिष्ठ उपरीक्षक जोशीको भनाइ छ । ‘आफूहरूका लागि बस चढ्ने ठाउँ तोकिदिएपछि उपप्राध्यापक आचार्यले पनि फाेन गरेर आभार व्यक्त गरे,’ उनले भने।
उनका अनुसार, सार्वजनिक यातायातमा फरक क्षमता भएकाको सहज पहुँचका लागि अन्य स्थानमा पनि बोर्ड राखिने छ । साथै, महाशाखाले सार्वजनिक सवारीसाधनका चालक सह–चालक तथा यात्रु वर्गलाई तोकिएको स्थानबाट मात्रै ‘पिक एन्ड ड्रप’ गर्न समेत अनुरोध गरेको छ ।
