प्रदेश नं १ मा थपिए १२३ कोरोना संक्रमित, २५१ जना डिस्चार्ज

विराटनगर, मंसिर २१ : पछिल्लो २४ घण्टामा प्रदेश नं १ मा ४६ जना महिलासहित १२३ जना कोरोना संक्रमित थपिएका छन्। थपिएका संक्रमितमा मोरङमा ४६ मध्ये विराटनगरमा ३४, झापामा ३७, सुनसरीमा १५, इलाममा ११, ताप्लेजुङमा दुई, तेह्रथुम, भोजपुर र उदयपुरमा एक÷एक र प्रदेश बाहिरका नौ जना रहेको सामाजिक विकास मन्त्रालयले जनाएको छ।

सोही अवधिमा होमआइसोलेशनबाट २२३, कोशी अस्पताल कोभिड १९ उपचार केन्द्रबाट १४, मेची अस्पतालबाट आठ र न्यूरो अस्पतालबाट पाँच, विराट मेडिकल कलेजबाट एक जनासहित २५१ जना डिस्चार्ज भएका छन्। हालसम्म डिस्चार्ज हुनेको सङ्ख्या २३ हजार १५० पुगेको छ।

 प्रदेश १ मा कोरोना संक्रमितको सङ्ख्या २८ हजार १७० पुगेको छ भने सक्रिय संक्रमितको सङ्ख्या पाँच हजार २० जना रहेको मन्त्रालयले जनाएको छ। सात सय ४३ जनासहित कूल एक लाख ९६ हजार ७४ जनाको पिसिआर परीक्षण भइसकेको मन्त्रालयको भनाइ छ।