सिमकोट विमानस्थलमा आगलागी, एक जना घाइते

हुम्ला, मंसिर १८ : हुम्लाको सिमकोट विमानस्थलको क्वाटरमा आगलागी भएको छ। आगो निभाउँदा एक जना घाइते भएका छन्।

आज बिहान ५ बजे आगलागी सुरु भएको हो। नेपाली सेना, सशस्त्र प्रहरी र नेपाल प्रहरीसहित स्थानीय बासिन्दाको टोलीले दुई घन्टा लगाएर आगो निन्त्रणमा लिएको छ।

आगो नियन्त्रणका क्रममा जिल्ला प्रहरी कार्यालय, हुम्लाका कर्मचारी गणेश सुइयाल घाइते भएका छन्। उनको हातमा चोट लागेको र उपचार भइरहेको छ। उनको अवस्था सामान्य रहेको प्रहरीले जनाएको छ।

विमानस्थलको क्वाटरमा हिटर जलाउँदा विद्युतको तार सर्ट आगलागी भएको हो। क्षतिको विवरण आउन बाँकी रहेको जिल्ला प्रहरी कार्यालयले जनाएको छ।