२५ हजार सक्रिय संक्रमित पुगेपनि बन्दाबन्दी गर्ने योजना छैन : स्वास्थ्य मन्त्रालय

काठमाडौं, असोज १५ : स्वास्थ्य तथा जनसंख्या मन्त्रालयले सक्रिय संक्रमितको संख्या बढिरहेपनि तत्काललाई बन्दाबन्दी गर्ने निर्णय नभएको जनाएको छ। 

अहिले मन्त्रालयले २५ हजार संक्रमित भए पनि बन्दाबन्दी गर्नुनपर्ने र सक्रिय संक्रमितलाई व्यवस्थापन गर्न सकिने बताएको छ। मन्त्रालयका प्रवक्ता डा. जागेश्वर गौतमले बन्दाबन्दी गर्ने योजना नभएको स्पष्ट पारे। सरकारको सक्रिय संक्रमित २५ हजार पुगेपछि नीजि स्वास्थ्य संघ–संस्था र होटेलमा सक्रिय संक्रमितलाई राख्ने योजना रहेको जनाएको छ।

केही दिन अघि २५ हजार सक्रिय संक्रमित भएपछि फेरि पनि बन्दाबन्दी (लकडाउन) गर्ने मन्त्रालयले निर्णय गरेको थियो। 

यही असोज ७ गते सचिव लक्ष्मण अर्यालको अध्यक्षतामा बसेको इन्सिडेन्ट कमाण्ड सिस्टमको बैठकले २५ हजार सक्रिय संक्रमित भएपछि सरकार मातहत रहेका अस्पतालले उपचारको व्यवस्थापन गर्न नसक्ने भन्दै सरकारलाई बन्दाबन्दी गर्नुपर्ने सिफारिस गर्ने निर्णय गरेको थियो।