शेयर बजारमा उछाल, एकै दिन बढ्यो ३२ अंक 

काठमाडौं, वैशाख ८ : शेयर बजारले लय समातेको छ। नयाँ वर्षको शुरुआतसँगै आफ्नो गति समातेको बजारमा आइतबार करीब ३२ अङ्कको सुधार देखिएको छ। 

कारोबार मापक नेप्से परिसूचक ३१.८९ विन्दुले बढेर एक हजार २६४.२० विन्दुमा पुगेको हो। यस्तै ठूला कम्पनीको शेयर कारोवार मापन गर्ने संवेदनशील परिसूचक ७.८४ विन्दुले बढेर २७३.४१ विन्दुमा पुगेको छ। कारोवार रकमसमेत आइतबार अर्बमाथि पुगेको छ। 

स्टकका अनुसार कूल १७१ कम्पनीको ३३ लाख ७५ हजार १५३ कित्ता शेयर एक अर्ब तीन करोड ६९ लाख ३२ हजार ७३२ मूल्यमा खरीद–बिक्री भए। बजार पूँजीकरणमा समेत वृद्धि भई १५ खर्बमाथि पुगेको छ। कारोबार भएका कूल १० उपसमूहमध्ये दुई उपसमूहको मात्रै शेयर घटेको छ। त्यसमा निर्जीवन बीमा ७.२२ र उत्पादन ११.९२ विन्दुले घटेका छन्। 

बैंकिङ ४५.९४, होटल ३४.८, विकास बैंक १६.९७, जलविद्युत् ८.८७, वित्त २.१३, अन्य ९.७, लघुवित्त २६.९१ र जीवन बीमा २२.२५ विन्दुले बढेका छन्। स्टकका अनुसार कारोवारका आधारमा आज वाणिज्य बैंक नै शीर्ष स्थानमा रहेका छन्

नेपाल बैंक लिमिटेडको १४ करोड ९४ लाख ५१ हजार ६५४, एनआइसी एशिया बैंक चार करोड ६० लाख ७६ हजार ९१, एनसिसी बैंक चार करोड ३१ लाख ३६ हजार ६६३, नेपाल इन्भेस्टमेन्ट बैंक चार करोड दुई लाख १२ हजार ८६१, सिभिल बैंक तीन करोड ९४ लाख ६२ हजार १२ बराबरको कारोवार भई शीर्षस्थानमा रहेका छन्। 

स्टकका अनुसार आइतबार स्ट्यान्डर्ड चार्टड बैंकका शेयरधनीले ९.९८ प्रतिशतले कमाए। नेपाल एसबिआई बैंक ९.८९, स्वदेशी लघुवित्त वित्तीय संस्था ९.८६ हिमालयन बैंक ९.०२, अरुण काबेली पावरका शेयरधनीले ८.५९ प्रतिशतले कमाए। 

यस्तै वेस्ट फाइनान्स कम्पनीका शेयरधनीले ४.१६ प्रतिशतले गुमाउँदा नेपाल सेवा लघुवित्त वित्तीय संस्था ४.०४, महिला सहयात्रा माइक्रोफाइनान्स वित्तीय संस्था ३.३३, नबिल इक्विटी फण्डका लगानीकर्ताले ३.११ प्रतिशतले गुमाए। रासस