‘बजेट यथार्थपरक छ, पूँजीगत खर्चको विनियोजन बढाइएको छ’ 

काठमाडौं, जेठ १६ : उपप्रधान तथा अर्थमन्त्री विष्णुप्रसाद पौडेलले पूँजीगत खर्चको विनियोजन बढाइएको बताएका छन्।

शुक्रबार आयोजित पत्रकार सम्मेलनमा बोल्दै अर्थमन्त्री पौडेलले चालु खर्चलाई सीमाभित्र राखिए पनि सरकारी वित्त हस्तान्तरणको आकारलाई वृद्धि गरिएको बताए।

‘यो बजेट कार्यान्वयन हुन्छ भन्ने कुरामा म सबैलाई विश्वास दिलाउन चाहन्छु। बजेट कार्यान्वयनका निम्ति व्यवहारिक, वस्तुनिष्ठ कार्यतालिका निर्माण गर्न अर्थ मन्त्रालय आजैदेखि काममा तत्पर रहेको छ,’ उनले भने, ‘बजेटको आकारको बारेमा कुरा गर्दा पूँजीगत खर्चको विनियोजन बढाइएको छ। चालु खर्चलाई सिमाभित्र राखिएको छ। सरकारी वित्त हस्तान्तरणको आकारलाई वृद्धि गरिएको छ।’

अर्थमन्त्री पौडेलले आर्थिक वर्ष २०८२/०८३ को बजेट यथार्थपरक ल्याएका दाबी गरे। उनले यस पटक बजेटको आकारको विषयमा त्यति टिप्पणी नभएको बताए। 

‘यो बजेट आम्दानी र खर्चको यथार्थपरक छ। आम्दानी र खर्च दुवैको प्रश्नमा बजेट यथार्थपरक छ। होटेल, रिर्सोट, सूचना प्रविधि उद्योगबाट हुने आयमा विशेष उद्योग सरह सुविधा दिने प्रवन्ध गरिएको छ,’ उनले भने। 

आगामी आर्थिक वर्षका लागि १९ खर्ब ६४ अर्ब ११ करोडको बजेट ल्याइएको छ।  बजेट चालूतर्फ ११ खर्ब ८० अर्ब ९८ करोड, पुँजीगत तर्फ ४ खर्ब ७ अर्ब ८९ करोड र वित्तीय तर्फ ३ खर्ब ७५ अर्ब २४ करोड विनियोजन गरिएको छ।

सरकारले ल्याएको बजेटका लागि राजस्व, अनुदान र ऋणबाट स्रोत जुटाइने भनिएको छ । जसमा राजस्वबाट १३ खर्ब १५ अर्ब, वैदेशिक अनुदानबाट ५३ अर्ब ४५ करोड, वैदेशिक ऋणबाट २ खर्ब ३३ अर्ब र आन्तरिक ऋणबाट ३ खर्ब ६२ अर्ब स्रोत जुटाइने भनिएको छ।