सार्वजनिक संस्थानको कुल सम्पत्ति २९ खर्ब १० अर्ब 

काठमाडौं, जेठ १५ : उपप्रधान तथा अर्थमन्त्री विष्णुप्रसाद पौडेलले आर्थिक सर्वेक्षण प्रस्तुत गर्दै सार्वजनिक संस्थानको कुल सम्पत्ति २९ खर्ब १० अर्ब १७ करोड पुगेको जानकारी गराएका छन्। 

अर्थमन्त्री पौडेलले प्रतिनिधिसभामा आर्थिक वर्ष २०८०÷८१ सम्ममा संस्थानहरूको कुल सम्पत्ति २.२० प्रतिशतले वृद्धि भएको बताएका हुन्। 

उनले सार्वजनिक संस्थानमा नेपाल सरकारको कुल लगानी ५.८६ प्रतिशतले वृद्धि भएको पनि बताए। सर्वेक्षण अनुसार औद्योगिक, व्यापारिक, सेवा र सामाजिक, जनउपयोगी र वित्तीय गरी ४५ वटा सार्वजनिक संस्थान सञ्चालनमा छन्। 

यीमध्ये २० वटा पूर्ण सरकारी स्वामित्वका छन् भने २५ वटामा अधिकांश सरकारको लगानी रहेको छ। 

यस्तै, संस्थानको कुल सञ्चालन आय ६ खर्ब ६० अर्ब १५ करोड पुगेको छ। ०७९÷८० को तुलनामा ०.२३ प्रतिशतले घटेको छ। 

सार्वजनिक संस्थानमध्ये हाल २८ वटा मात्र नाफामा छन् भने १५ वटा घाटामा छन् । दुईवटा संस्थान भने पूर्ण रूपमा बन्द भइसकेका छन्।