‘मनका कुरा विथ वसन्त चौधरी’ प्रसारण हुने
काठमाडौं, पुस ५ : उद्यमी तथा साहित्यकार वसन्त चौधरीले समाजका विभिन्न क्षेत्रका व्यक्तित्वसँग अन्तर्वार्ता गरी युट्यब च्यानलमार्फत ‘मनका कुरा विथ वसन्त चौधरी’ श्रव्यदृश्य कार्यक्रम सञ्चालन गर्ने भएका छन्।
सिजी इन्टरटेन्मेन्टद्वारा भोलि शुक्रबारदेखि उक्त श्रब्यदृश्य कार्यक्रम प्रसारण गरिने उक्त इन्टरटेनमेन्टका सहअध्यक्ष एवं वरिष्ठ कलाकार हरिहर शर्माले आज आज यहाँ पत्रकार सम्मेलन गरी जानकारी दिए। उनका अनुसार भोलि शुक्रबारदेखि सिजी इन्टरटेनमेन्ट युट्युब च्यानलमा हरेक शुक्रबार राति ८ बजे उक्त कार्यक्रम प्रसारण हुनेछ।
उक्त कार्यक्रममा वसन्त चौधरीका भोगाइ र सफलताका कुराबाहेक जीवन र जगत्बाट सिकेका र अनुभूत गरेका भोगाइ र उहाँका सिर्जनाका साथै समाजका विभिन्न क्षेत्रमा लागेर ख्याति कमाएका र सङ्घर्षशील जीवन यापन गरी समाजमा उदाहरणीय बनेका व्यक्तित्वका अनुभूति र कार्यपद्धतिलाई समेटिने पत्रकार सम्मेलनमा वरिष्ठ कलाकार शर्माले जानकारी दिए।
कार्यक्रमका हरेक शृङ्खलामा ती व्यक्तित्वलाई ल्याएर उनीहरुको सङ्घर्ष तथा जीवन यात्राका आरोह–अवरोह पस्किने र यसबाट समाजमा सकारात्मक काम तथा जीवनमा प्रगतिका लागि प्रेरणा प्रदान गर्न सकिने सो कार्यक्रमको लक्ष्य रहेको शर्माले बताए। उद्योगी व्यवसायी चौधरी व्यवसायका साथै साहित्यकर्ममा पनि छन्।
