राजदूत अधिकारीद्वारा पाकिस्तानको तेस्रो ठूलो औद्योगिक केन्द्रका उद्योगी, व्यवसायीसँग छलफल

काठमाडौं, असार ४ : पाकिस्तानका लागि नेपालका राजदूत तापस अधिकारीले त्यहाँका उद्योगी व्यवसायीहरूसँग छलफल गरेका छन् ।

उनले गुजरनवाला चेम्बर अफ कमर्स एन्ड इन्डस्ट्रीका पदाधिकारीहरूसँग संवाद गरेका हुन् । अध्यक्ष उमर असरफ मुगल र कार्यसमिति सदस्यहरूले राजदूत अधिकारीसँग दुई मुलुकको द्विपक्षीय सम्बन्ध र आर्थिक सहकार्यका सम्भावनाहरूबारे छलफल गरेका थिए ।

त्यसक्रममा राजदूत अधिकारीले द्विपक्षीय सम्बन्ध मजबुत बनाउन नेपालमा आर्थिक अवसरहरूको खोजी गर्न पाकिस्तानका उद्योगी, व्यवसायीलाई आग्रह गरे । र, पर्वतीय पर्यटनको केन्द्र मानिने नेपालका विभिन्न भूभागमा पुगेर नेपाली आतिथ्यताको स्वाद लिन उनले आग्रह गरे ।

कार्यक्रममा चेम्बर अध्यक्ष मुगल र सदस्यहरूले गुजरावालामा व्यावसायिक गतिविधिहरूबारे प्रस्तुती दिएका थिए । चेम्बरको टोलीले नेपाल भ्रमण गरेर व्यापारका अवसरहरू पहिल्याउने आश्वासन उनीहरूले दिएको राजदूत अधिकारीले जानकारी दिए । कार्यक्रममा पाकिस्तानको पञ्जाबस्थित सञ्चारकर्मीहरूको ठूलो संख्यामा उपस्थिति थियो ।

गुजरनवाला पाकिस्तान शासित पञ्जाबको एक मुख्य सहर हो । र, ५० लाख जनसंख्या भएको यो पाकिस्तानको सबैभन्दा बढी आवादी भएको पाँचौँ सहर हो ।

१८ औँ शताब्दीमा स्थापित यो सहरमा सन् १७६३ देखि १७९९ सम्म तत्कालीन मिस्ल राज्यको राजधानी थियो । र, यो शिख साम्राज्यका संस्थापक महाराजा रणजित सिंहको जन्मस्थल पनि हो । अहिले गुजरनवाला फैसलावाद र कराँचीपछि पाकिस्तानको तेस्रो ठूलो औद्योगिक केन्द्र हो । र, पाकिस्तानको कुल गार्हस्थ्य उत्पादनको पाँच प्रतिशत हिस्सा यही सहरले ओगटेको छ ।
 

 Published Date: Friday, 18th June 2021 3:06:00 pm