३० खर्ब ५४ अर्ब पुग्यो बजार पुँजीकरण
नेप्सेमा देखिएको दोहोरो अंकको वृद्धि पछि आज कूल बजार पुँजीकरण ३० खर्ब ५४ अर्ब ५३ करोड ८८ लाख ३० हजार पुगेको छ ।काठमाडौं– नेप्सेमा देखिएको दोहोरो अंकको वृद्धि पछि आज कूल बजार पुँजीकरण ३० खर्ब ५४ अर्ब ५३ करोड ८८ लाख ३० हजार पुगेको छ । मुलुकको कूल गार्हस्थ्य उत्पादन र बजार पुँजीकरणको आकार करिब–करिब उस्तै हुने क्रममा पुगेको छ ।
हरेक दिन नयाँ–नयाँ रेकर्ड राख्दै अगाडि बढेको धितोपत्र बजारमा सेयर कारोबार मापक नेप्से परिसूचक आज पनि दोहोरो अंकले उकालो लागेको छ ।
नेप्सेको वृद्धिसँगै नेपालको सेयर बजारको इतिहासमा आज हालसम्मकै उच्च बिन्दुमा पुगेको छ । यस्तै बजार पूँजीकरण पनि साढे ३० खर्बको हाराहारीमा पुगेको छ । नेपाल स्टक एक्सचेन्ज का अनुसार नेप्से २८.३१ बिन्दुले उकालो लागेर २ हजार २६७.७३ मा पुगेको छ ।
यस्तै ठूला कम्पनीको सेयर कारोबार मापन गर्ने सेन्सेटिभ परिसूचक ३.८९ ले वृद्धि भई ४३३.२८ मा पुगेको छ । कूल २०२ कम्पनीको १ करोड ३५ लाख ३१ हजार २२७ कित्ता सेयर ४ अर्ब ९८ करोड २३ लाख ९१ हजार ८९७ मूल्यमा खरिद बिक्री भए ।