विकासको सपना बाँड्दै प्रधानमन्त्रीले भने– हामीलाई देश विकास गर्नु छ, गालीगलौज गर्ने फुर्सदै छैन
उनले नेकपा दाहाल–नेपाल समूहलाई कटाक्ष गर्दै भने, ‘केही भगौडाहरु सडकमा गएर अश्लील गालीगलौज गरेर बसेका छन् । हामीलाई त देश विकास गर्नु छ, गालीगलौज गर्ने फुर्सदै छैन ।’काठमाडौं– प्रधानमन्त्री केपी शर्मा ओलीले देशविकास गर्न व्यस्त भएकाले गालीगलौज गरेर बस्ने समय नभएको बताएका छन् । आज धनगढीमा आयोजित नेकपा ओली समूहको कार्यक्रममा सम्बोधन गर्दै प्रधानमन्त्री ओलीले देशविकास गर्न लागिपरेकाले गालीगलौज गरेर बस्ने समय नभएको बताएका हुन् ।
उनले नेकपा दाहाल–नेपाल समूहलाई कटाक्ष गर्दै भने, ‘केही भगौडाहरु सडकमा गएर अश्लील गालीगलौज गरेर बसेका छन् । हामीलाई त देश विकास गर्नु छ, गालीगलौज गर्ने फुर्सद छैन ।’ उनले केही भगौडाहरु केन्द्रीय कमिटीको बैठकमा नआएर अन्त गएर गालीगलौजमा समय बिताएको भन्दै चर्को आलोचना गरे । उनले भने, ‘बाटामा बसेर भन्छन्, हामी यहाँ छौँ । मुख छाडेर हिँडेका छन् ।’
उनले सम्बोधनका क्रममा विकासका अनेक आयामको चर्चा गरे । उनले नेपाली जनतालाई कसरी सुखी बनाउने भन्नेतर्फ केन्द्रित भएको बताए । उनले भने, ‘हाम्रो ध्यान नेपाली जनताले पाएको दुःखप्रति छ । हामी आफ्ना लागि स्वदेशमा पर्याप्त उत्पादन कसरी गर्ने भनेर चिन्तित छौँ । कृषिको व्यवसायीकरण गर्नु छ । डोकामा होइन, ट्याक्टरमा उत्पादन ओसारपसार गर्ने व्यवस्था मिलाउँछौँ ।’
उनले सिँचाइ, स्वास्थ्य, विमानस्थल, खानीलगायतका विषय उठान गरेर विकास निर्माणका काम गर्ने आश्वासन दिए ।