आईतबार, कात्तिक ९, २०७७

राष्ट्रिय क्रिकेट टोलीका खेलाडीले पाए एक वर्षको पारिश्रमिक

फाइल तस्वीर।

काठमाडौैं, भदौ २५ : नेपाली राष्ट्रिय क्रिकेट टोलीका खेलाडीले आफ्नो एक वर्षको पारिश्रमिक पाएका छन्। उनीहरुले सन् २०१९ को पारिश्रमिक पाएका हुन्। 

नेपाल क्रिकेट संघ (क्यान)ले राष्ट्रिय क्रिकेट टोलीका २२ खेलाडी तथा एक भिडियो एनालिस्टलाई एक वर्षको पारिश्रमिक उपलब्ध गराएको हो। क्यानले बुधबार सबैको खातमा रकम जम्मा गरेको जनाएको छ।

अन्तर्राष्ट्रिय क्रिकेट परिषद् (आईसीसी)ले पारिश्रमिक नेपाल क्रिकेट संघ (क्यान)को खातामा पठाएको थियो। उक्त रकम क्यानले खेलाडीको खातामा जम्मा गरेको क्यानका कोषाध्यक्ष रोशनबहादुर सिंहले जानकारी दिए। राष्ट्रिय टोलीका खेलाडीहरुले सन् २०१९ पछि आफ्नो नियमित पाउनुपर्ने पारिश्रमिक पाउन सकेका थिएनन्। 

क्यानले नेपाली खेलाडीलाई ए, बी र सी श्रेणीमा विभाजन गरेको थियो। उनीहरुमध्ये ए श्रेणीमा रहेका खेलाडीले मासिक ४५ हजार, बी श्रेणीमा रहेका खेलाडीले ३५ हजार तथा सी श्रेणीमा रहेका खेलाडीले २५ हजार पारिश्रमिक पाएका हुन्। क्यानले यसअघि ए श्रेणीमा रहेकालाई मासिक ३५ हजार, बी श्रेणीमा रहेकालाई २५ हजार तथा सी श्रेणीमा रहेका खेलाडीलाई १५ हजार पारिश्रमिक उपलब्ध गराउँदै आएको थियो। 

आईसीसीले पारिश्रमिकका लागि खेलाडीको सूची मागेपछि क्यानले भदौ पहिलो साता २३ जनाको नाम पठाएको थियो। क्यानले पठाएको खेलाडीको सूची क्यान निलम्बन फुकुवा हुनुअघिकै हो। सन् २०१९ को पारिश्रमिकका लागि खेलाडीको सूची आईसीसीलाई पठाइएको थियो। 

यसअघि क्यान निलम्बनमा रहेको अवस्थामा खेलाडीको पारिश्रमिक आईसीसीले नै उपलब्ध गराउँदै आएको थियो। आईसीसीले सन् २०१८ मा दुई वर्षको पारिश्रमिक राष्ट्रिय खेलकुद परिषदमार्फत पठाएको थियो। त्यसयता खेलाडीले आफ्नो पारिश्रमिक पाउन सकेका थिएनन्। क्यानले खेलाडीलाई पारिश्रमिकका लागि यसअघि तीन वर्गमा विभाजन गरेको थियो। त्यहीअनुसार नै २१ खेलाडीका लागि आईसीसीले पारिश्रमिक उपलब्ध गराएको हो।  

ए श्रेणीमा कप्तान ज्ञानेन्द्र मल्ल, पारस खड्का, शरद भेषवाकर, सन्दीप लामिछाने, दीपेन्द्रसिंह ऐरी, सोमपाल कामी, करण केसी र विनोद भण्डारी छन् भने बी श्रेणीमा बसन्त रेग्मी, आरिफ शेख, अविनाश बोहरा, पवन सराफ, रोहितकुमार पौडेल, सन्दीप जोरा, ललितनारायण राजवंशी र सुशन भारी तथा सी श्रेणीमा रशिद खान, इशान पाण्डे, प्रदीप ऐरी, कुशल मल्ल, कुशल भुर्तेल र राजु रिजाल रहेका छन्। 

‘ए’ श्रेणीमा रहेका खेलाडीले एक वर्षको एकमुष्ट पाँच लाख ४० हजार, ‘बी’ श्रेणीका खेलाडीले चार लाख २० हजार तथा ‘सी’ श्रेणीका खेलाडीले तीन लाख पाएका छन्। यस्तै, टेक्निकल एनालिष्ट रमन शिवाकोटीले पनि  ‘सी’ श्रेणीका खेलाडीको बराबर पारिश्रमिक प्राप्त गरेका छन्। 

 Published Date: Thursday, 10th September 2020 10:01:00 am