‘दलित महिला हिंसामा पर्नुको प्रमुख कारण आर्थिक पक्ष’

काठमाडौं, मंसिर १६ : दलित महिला संघकी संस्थापक अध्यक्ष दुर्गा सोवले बढी मात्रामा आर्थिक पाटोले दलित महिला हिंसामा पर्ने गरेको बताएकी छन्। नेपालमा दलित महिला र बालिकामाथि हुने हिंसाको अवस्था अध्ययन प्रतिवेदन सार्वजनिकरण तथा अन्तर्क्रिया कार्यक्रममा बोल्दै उनले यस्तो बताएकी हुन्।

वैदेशिक रोजगारीमा दलित महिलाहरु गैरकानूनी रुपमा गइरहेको र व्यवसाय गर्दा पनि जातको कारणले नचल्ने हुँदा बढी मात्रामा आर्थिक पाटोले दलित महिला हिंसामा पर्ने गरेको सोवको भनाइ छ।

‘वैदेशिक रोजगारीमा जाने भनेकै जनजाति र दलित महिलाहरु हो । अहिले महिला हिंसाको एउटा पाटो भनेको आर्थिक देखियो। विशेष दलित वर्ग आर्थिक पाटोका कारण बढी हिंसामा पर्यो,’ उनले भनिन्, ‘त्यही भएर वैदेशिक रोजगारमा महिला गैरकानूनी रुपमा गइरहेका छन् । कुनै व्यवसाय गर्दा जातकै कारणले पनि चल्दैन ।’

उनले अब तीन तहको सरकारलाई दलित महिलामाथि हुने हिंसाप्रति जवाफदेही बनाउन आवश्यक रहेको बताइन्।