टिकटकमाथि प्रतिबन्धविरुद्ध अर्को रिट दर्ता 

काठमाडौं, मंसिर ४ : टिकटकमाथि प्रतिबन्ध लगाउने सरकारको निर्णयविरुद्ध सर्वोच्च अदालतमा अर्को रिट दर्ता भएको छ।

सोमबार पत्रकार एवम् अधिवक्ता जगन्नाथ दुलालसमेतले रिट दर्ता गरेका हुन्। टिकटक प्रतिबन्धका कारण अभिव्यक्ति स्वतन्त्रताको हक हनन् भएको प्रश्न उठाउँदै रिट दर्ता भएको हो। रिटमा नेपाल दूरसञ्चार प्राधिकरणले इन्टरनेट सेवा प्रदायकहरुलाई गरेको पत्राचार बदरको माग गरिएको छ।

धेरै नागरिकले टिकटकमार्फत सूचना पाइरहेको अबस्थामा प्रतिबन्ध लगाउँदा संविधान प्रदत्त सूचनाको हक कुण्ठित भएको दाबी समेत गरिएको छ।

यसअघि टिकटक फुकुवाको मागसहित शुक्रबार दशवटा रिट दर्ता भएका थिए। ति रिटको सुनुवाई सोमबारका लागि तोपकिए पनि ‘हेर्न नभ्याइने’ मा परेका छन्।