कीर्तिपुरमा क्रिकेट क्रेज [तस्बिरहरू]

काठमाडौं, कात्तिक १९ : कीर्तिपुरमा आज आइसिसी टी–२० विश्वकप एसिया क्षेत्र छनोटको फाइनलमा आज नेपाल र ओमानबीच प्रतिस्पर्धा भयो। नेपाललाई सुपर ओभरमा हराउँदै ओमानले आइसिसी टि२० विश्वकप एसिया क्षेत्र छनोटको उपाधि जितेको छ। खेल बिहान ११ बजे टियु क्रिकेट मैदानमा सुरु भएको थियो। पहिला ब्याटिङ गर्दै नेपालले दिएको १८५ रनको लक्ष्य पछ्याएको ओमानले ९ विकेटको क्षतिमा १८४ रन बनाए पछि खेल सुपर ओभरमा गएको थियो।

ओमानलाई पराजित गरेर नेपालले उपाधि उचाल्ला भन्ने ठुलो आशा र विश्वास नेपाली क्रिकेट टिमका समर्थकहरूले राखेका थिए। त्यसकारण खेल सुरुहुनुअगावै दर्शकदीर्घा भरिभराउ भइसकेको थियो। कतिपय समर्थक रूखमा चढेर खेल हेरेका थिए। नेपाली टोलीलाई उत्साह दिन आएका दर्शकहरूले अन्तिमसम्म पनि धैर्य गरिरहे। अन्ततः नेपाल पराजित भएपछि उनीहरू निराश भए। तर पनि विश्वकप खेल्नका लागि योग्य भइसकेकाले दर्शकहरू त्यति साह्रो हतोत्साही भने थिएनन्। खेल चलिरहँदा उनीहरूको हुटिङ अत्यन्त लोभलाग्दो थियो। घरेलु मैदानमा खेल भएकाले पनि समर्थकको ओइरो लाग्नु स्वाभाविक थियो।