दसैँमा देश छाड्नेहरू [फाेटाेफिचर]

काठमाडौं, कात्तिक २ : दसैं सुरु भइसकेको छ। किनमेल सकिएकाहरू घर जान हतारिएका छन्। एकदुई दिन पछाडि घर जानेहरू किनमेलमै व्यस्त छन्। घर जानुनपर्नेहरू पनि आफ्नै तरिकाले दसैंलाई उत्सवमय बनाइरहेका छन्। घरकाे रङराेगन र लिपपाेत, बाटाेघाटाे  सरसफाइ, पिङ हाल्ने कार्यक्रमले दसैंकाे माहाेललाई थप राैनकमय बनाएका छन्। मालश्री धुन र दसैं गीत गुन्जिएका छन्। 

यसरी अधिकांश नेपाली दसैको उत्सवमा रमाइरहँदा रोजगारी र उच्च शिक्षाका लागि विदेश जान बाध्य बनेकाहरू भने मलिन अनुहार लिएर त्रिभुवन अन्तर्राष्ट्रिय विमानस्थालमा उडानको प्रतीक्षामा छन्। उनीहरू सबैमा प्रायः भावुकता देखिन्छ। चाडबाडको मुखमा रहरले भन्दा पनि बाध्यतामा परेर देश र घरपरिवार छाडी विदेश जान लागेकाहरू र उनीहरूको बिदाइका लागि विमानस्थाल पुगेका आफन्त तथा साथीभाइहरू सबै खिन्न देखिन्छन्।

भारी मनले हुने बिदाइले कतिपयका आँखा आँसुले भरिएका छन् त कतिपयले जबर्जस्ती हाँस्न खोजे पनि उदात्तता देखिन्न। कोही बढी नै भावुक बनेकाले बोल्न सकिरहेका थिएनन् । केहीले भने अहिलेको दसैं मनाउन नपाइए पनि भविष्यलाई सुनौलो बनाउने सपना बोकेर बिदेसिन लागेको र चाँडै नै फर्केर आई सबैजनासँग हाँसोखुसीसाथ दसैं मनाउने बताए।