राष्ट्र बैंकमा नयाँ नोट साट्नेकाे भिड [फाेटाेफिचर]

काठमाडाैं, असाेज २९ : नेपाल राष्ट्र बैंकले दसैँ, तिहारलगायत चाडबाडलाई लक्षित गरी नयाँ नोट सटही सुरु गरेको छ। राष्ट्र बैंकले हरेक वर्ष चाडबाडको समयमा नयाँ नोट सटहीको सुविधा दिँदै आएको छ। काठमाडौँ उपत्यकाभित्रको हकमा राष्ट्र बैंकअन्तर्गतको मुद्रा व्यवस्थापन विभाग र विभिन्न वाणिज्य बैंकहरुका शाखामा नयाँ नोट साट्न पाइने व्यवस्था गरिएको छ।

काठमाडौँ उपत्यका बाहिरको हकमा राष्ट्र बैंकको प्रदेशस्थित कार्यालय वा वाणिज्य बैंकका शाखा कार्यालयमा नोट साट्न सकिने राष्ट्र बैंकले जनाएको छ। वाणिज्य बैंकहरुले राष्ट्र बैंकबाट त्यस्ता नोट लिएर सटही सुविधा दिइरहेका छन्। रू. पाँच, १०, २०, ५० र एक सय दरका नयाँ नोट साट्न पाइने बैंकले जनाएको छ। नयाँ नोट सटही सुरु भएसँगै बालुवाटारस्थित राष्ट्र बैंकका सर्वसाधारणको लामो लाइन लागेको थियो। 

पहिले विकास बैंक र फाइनान्स कम्पनीबाट पनि सटही हुन्थे। त्यसबाहेक बैंकका हरेक शाखाहरुबाट वितरण हुन्थ्यो। यसपालि राष्ट्र बैंकले वाणिज्य बैंकहरुको सीमित शाखाहरुबाट मात्रै नोट बाँड्ने व्यवस्था मिलाएको छ। केही बैंकले नोट सटही गर्ने शाखाहरुको सूची निकालेका छन्।