कर्णालीका मुद्दालाई भोटसँग मात्र जोडियो : राजेन्द्र लिङ्देन

सुर्खेत, भदौ २२ : राष्ट्रिय प्रजातन्त्र पार्टीका अध्यक्ष राजेन्द्र लिङ्देनले राजनीतिक दलहरुले कर्णालीका मुद्दालाई भोटसँग मात्र जोडेको आरोप लगाएका छन्।

कर्णालीका सम्भावनालाई चुनावी ‘एजेन्डा’ मात्र बनाएको बताउँदै उहाँले राष्ट्रिय प्रजातन्त्र पाटीले अवसर पाए कर्णालीका अनेकौँ सम्भावनाको ढोका खोल्ने दाबी गरे। 

सुर्खेत विमानस्थलमा पत्रकारहरूसँग कुरा गर्दै उनले आफूहरुले सत्ता केन्द्रित राजनीति नगर्ने बताएका छन्। पछिल्लो समय विभिन्न सञ्चारमाध्यममा राप्रपाले कोशी सरकारमा सहभागी हुन केन्द्रमा पनि केही मन्त्रालयको माग गरेको भन्ने समाचारमा सत्यता नरहेको बताउँदै उनले राप्रपा सरकारमा जान आतुर नभएको र राप्रपाले सत्ता केन्द्रित राजनीति नगर्ने बताए। 

पछिल्लो समय सरकारले भ्रष्टाचारका फाइल खोले पनि अनुसन्धानले तीव्रता नपाएको उनको भनाइ थियो । उनले भने, 'सरकारले भ्रष्टाचारका फाइल खोल्न र अनुसन्धान गर्न हाम्रो पार्टीका १४ सांसदको साथ चाहिए दिन तयार छौं।'

सोच र कार्यशैलीमा नवीन, राप्रपा अब नवीन राप्रपा भन्ने कार्ययोजना अनुसार सुर्खेतमा हुने कार्यकर्ता प्रशिक्षणका लागि राप्रपा अध्यक्षसहितका नेताहरु आज सुर्खेत आएका हुन्।