नक्कली शैक्षिक प्रमाणपत्र प्रकरणमा थप दुई चिकित्सक पक्राउ

काठमाडौं, साउन २६ : नक्कली शैक्षिक योग्यता प्रमाणपत्र बनाएर चिकित्सक बनेको आरोपमा थप दुई जना  पक्राउ परेका छन्। नेपाल प्रहरीको केन्द्रीय अनुसन्धान ब्यूरो (सिआईबी)ले उनीहरुलाई पक्राउ गरेको हो।

मोरङका मनित चौधरी र काठमाडौंस्थित इशान अस्पतालमा कार्यरत श्रद्धा शिल्पकारलाई पक्राउ गरिएको सिआईबीका प्रवक्ता तथा प्रहरी उपरीक्षक नवराज अधिकारीले जानकारी दिए।

उनका अनुसार चौधरीलाई आज बिहान मोरङबाट र शिल्पकारलाई गए राति काठमाडौंबाट पक्राउ गरिएको हो। नक्कली शैक्षिक प्रमाणपत्र बनाउनेविरुद्ध ब्यूरोले अपरेसन थालेको छ।

यही प्रकणमा सिआईबीले बिहीबार सांसद तथा मेडिकल व्यवसायिक सुनिल शर्मासहित पाँच जनालाई पक्राउ गरेको थियो।