राप्ती स्वास्थ्य विज्ञान प्रतिष्ठान दाङमा शुक्रबार पनि प्रदर्शन

दाङ, असार २९ : राप्ती स्वास्थ्य विज्ञान प्रतिष्ठान दाङमा शुक्रबार पनि प्रदर्शन भएको छ।

घोराही उपमहानगरपालिका–३ का ११ वर्षीय आक्रोश नेपालीको अस्पतालको लापरबाहीका कारण मृत्यु भएको भन्दै बिहीबार देखि सुरु भएको नाराबाजी सहितको प्रदर्शन शुक्रवार पनि भएको हो।

विरोध प्रदर्शनका कारण अस्पतालको उपचार सेवा प्रभावित बनेको छ। आन्दोलन चर्किंदै गएपछि प्रतिष्ठान परिसरमा शुक्रबार पनि बिहानैदेखि प्रहरी परिचालन गरिएको थियो।

बालकको मृत्युबारे सत्यतथ्य छानबिन गरी दोषीलाई कारबाही र उचित क्षतिपूर्तिको माग पीडित पक्षले गर्दै आएको छ। पीडित पक्ष र अस्पताल प्रशासनबीच बिहीबार वार्ता भएपनि सहमति हुन सकेको थिएन्।

शुक्रबार बिहान ८ बजेदेखि पुनः वार्ता गर्ने सहमति भएपनि पीडित पक्षको माग सम्बोधन नहुने देखेपछि उनीहरुले बिहानैदेखि आन्दोलनलाई निरन्तरता दिएका छन्।