ताप्लेजुङ पहिरो अपडेटः बावुछोराको मृत्यु, एकै परिवारका तीनजना अझै बेपत्ता

ताप्लेजुङ, असार ५ः गत शनिबार राति ताप्लेजुङ सिदिङ्वा गाउँपालिका–६, मेहेलेमा गएको पहिरोमा परी बावुछोराको मृत्यु भएको छ भने एकै परिवारका तीनजना हालसम्म बेपत्ता छन् । स्थानीय र नेपाल प्रहरीको संयुक्त प्रयासमा बेपत्ताहरूको खोजी कार्य जारी छ ।

मृत्यु हुनेमा मेहेलेका ६७ वर्षीय केशरबहादुर राई र उनका छोरा ३६ वर्षीय केशरकुमार रहेका छन् । जिल्ला प्रहरी कार्यालय ताप्लेजुङका प्रहरी प्रमुख प्रहरी नायब उपरीक्षक राजन लिम्बूका अनुसार बेपत्ता भएका भालुखोपकी ६३ वर्षीया भगीमाया बुढाक्षेत्री, उनकी बुहारी ३० वर्षीया सन्ध्या र नाति ९ वर्षीय प्रज्ज्वल खोजी कार्य भइरहेको छ ।

सोही पहिरोमा परी गग्भीर घाइते अवस्थामा रहेका ४५ वर्षीय राजकुमार राईको नेपाली सेनाको हेलिकोप्टरले उद्धार गरिएको थियो । प्रतिकूल मौसमका कारण पाँचथर जिल्लामा आकस्मिक अवतरण गरेर त्यहीँ सुरूवाती उपचार भएको थियो । घाइते राईलाई थप उपचारका लागि हेलिकोप्टरमार्फत नै विराटनगरको न्यूरो अस्पताल लगिसकिएको छ ।