विनियोजन विधेयक, २०८० माथि मन्त्रालयगत छलफल सुरु

काठमाडाैं, जेठ ३२ : प्रतिनिधिसभा बैठकमा विनियोजन विधेयक, २०८० माथि बिहीबारबाट मन्त्रालयगत छलफल सुरु भएको छ।

प्रतिनिधिसभाको बिहीबारको बैठकमा वन तथा वातावरण मन्त्रालय, महिला, बालबालिका तथा ज्येष्ठ नागरिक मन्त्रालय र युवा तथा खेलकुद मन्त्रालयको विनियोजन शीर्षकमाथिको सामूहिक छलफल भएको हो। विनियोजन विधेयक अन्तर्गत उक्त मन्त्रालयहरुमाथि विनियोजित रकमलाई घटाइ खर्च कटौती गरियोस् भनी प्रस्ताव पेस भएको छ।

बैठकमा सांसद नारायणप्रसाद आचार्य, प्रेम सुवाल, भगवती चौधरी र सूर्यप्रसाद ढकालले विभिन्न मन्त्रालयको विनियोजन शीर्षकको खर्च रकम कटौतीको प्रस्ताव गर्नुभएको थियो। सांसद आचार्यले ‘विनियोजन विधेयक, २०८० अन्तर्गत वन तथा वातावरण मन्त्रालयको शीर्षकको खर्च रकमलाई घटाइ एक रुपैयाँ कायम गरियोस’ भरी खर्च कटौतीको प्रस्ताव प्रस्तुत गर्दै बजेट सन्तुलनकारी नदेखिएको, प्राकृतिक साधनस्रोतको उपयोगको नीति नलिइएको बताए।

त्यस्तै  सांसद सुवालले ‘विनियोजन विधेयक, २०८० अन्तर्गत वन , महिला, र युवा मन्त्रालय शीर्षकको खर्च रकममा उल्लेखित खर्च रकम घटाइयोस’ भनी खर्च कटौतीको प्रस्ताव प्रस्तुत गर्दै ठूला भ्रष्टाचारी तथा देश द्रोहीलाई मृत्युदण्ड दिनुपर्ने विषय बजेटमा नआएकाले खर्च कटौती गर्नुपर्ने बताए।

सांसद भगवती चौधरीले महिला मन्त्रालय शीर्षकको खर्च रकमलाई घटाइ एक रुपैयाँ कायम गरियोस भनी खर्च कटौतीको प्रस्ताव प्रस्तुत गर्दै सातै प्रदेशमा महिला, बालबालिका तथा ज्येष्ठ नागरिक आश्रय गृह बनाउने निर्णय नआएको बताइन्।

सांसद सूर्यप्रसाद ढकालले युवा मन्त्रालय शीर्षकको खर्च रकमलाई घटाइ एक रुपैयाँ कायम गरियोस भनी खर्च कटौतीको प्रस्ताव प्रस्तुत गर्दै बजेटले कुनै पनि तह र तप्कालाई सम्बोधन गर्न नसकेको दाबी गरे। प्रतिनिधिसभामा केहि दिन लगाएत मन्त्रालयगत बजेट छलफल हुने र सम्बन्धीत मन्त्रीले जवाफ दिनेछन्।  सरकारले जेठ १५ गते संसदमा आगामी आर्थिक बर्षको बजेट प्रस्तुत गरेको थियो।