पुनरुत्थानवादीहरू संघीय लोकतान्त्रिक गणतन्त्रविरुद्ध सल्बलाउन खोजिरहेका छन् : बाबुराम भट्टराई
बिहीबारबाट भक्तपुरमा सुरु भएको समाजवादी पार्टीको केन्द्रीय समिति बैठकमा राजनीतिक प्रतिवेदन पेस गर्दै भट्टराईले पछिल्लो समय उत्पीडित जाति र आम जनतामा निराशा र असन्तुष्टि बढ्दै गइरहेको र यसबाट फाइदा लिँदै धमिलो पानीमा माछा मार्न पुनरुत्थानवादी शक्तिहरु गणतन्त्रको विरुद्धमा नै सल्बलाउन खोजिरहेको बताए।
काठमाडाैं, जेठ २५ : नेपाल समाजवादी पार्टीका अध्यक्ष डा. बाबुराम भट्टराईले पुनरुत्थानवादी शक्तिहरू संघीय लोकतान्त्रिक गणतन्त्रको विरुद्धमा सल्बलाउन खोजिरहेको बताएका छन्।
बिहीबारबाट भक्तपुरमा सुरु भएको समाजवादी पार्टीको केन्द्रीय समिति बैठकमा राजनीतिक प्रतिवेदन पेस गर्दै भट्टराईले पछिल्लो समय उत्पीडित जाति र आम जनतामा निराशा र असन्तुष्टि बढ्दै गइरहेको र यसबाट फाइदा लिँदै धमिलो पानीमा माछा मार्न पुनरुत्थानवादी शक्तिहरु गणतन्त्रको विरुद्धमा नै सल्बलाउन खोजिरहेको बताए।
प्रत्यक्ष निर्वाचित कार्यकारी राष्ट्रपतीय प्रणाली र पूर्ण समानुपातिक संसद्, जातीय/भाषिक पहिचा नका आधारमा प्रदेशहरूको पुनः सीमांकन र नामांकन लगायतका संशोधन नभएसम्म राजनीतिक अस्थीरता र जनताको असन्तुष्टि कायम रहन्छ भन्ने कुरा अहिले व्यवहारतः पुष्टि हुँदै गएको उनले बताए।
उनले दुईपटकको आमनिर्वाचनपछि पनि देशमा राजनीतिक स्थिरता कायम हुन नसकेका कारण सुशासन र आर्थिक-सामाजिक रुपान्तरण हुन नसकेको बताए। उनले सत्य निरूपण तथा मेलमिलाप आयोग र बेपत्ता व्यक्तिहरूको छानबिन आयोगको काम छिटो सम्पन्न गर्न जरुरी रहेको भन्दै यस्तो हुन नसके देशमा अर्को द्वन्द्वको खतरा मडारिन सक्ने तर्क गरे।
लोकतन्त्रका यी आधारशिलामा टेकेर मात्र समृद्धि र समाजवादको दिशामा अघि बढ्न सकिने भएकाले यस विषयमा पार्टीको बैठकले विशेष निर्णय गर्ने उहाले जानकारी दिए। उनले स्थापित कम्युनिष्ट ब्रान्डका दलहरु र भुल्काका रुपमा आएका नयाँ दलहरु आफ्नो दलबीच के फरक छ भन्ने कुरा पनि बैठकले स्पष्ट पार्ने जिकिर गरे।
राजनीतिक प्रतिवेदनमा भट्टराईले राष्ट्रिय जनता पार्टीसँग एकता गरेर जसपा निर्माण गर्ने कार्य सैद्धान्तिक रुपमा सही भए पनि वैचारिक–राजनीतिक कारण एकता कायम गर्न नसकिएको उल्लेख गरेका छन्। दुई दिनसम्म चल्ने बैठकले पार्टीको भावी रणनीति तय गर्ने बताइएको छ।
