पदभार सम्हाल्दै कानून मन्त्री खड्काले भने-ऐन निर्माणमा प्राथमिकता तोकेर काम गर्छौ
काठमाडौं, वैशाख ६ : उपप्रधान, रक्षा एवं कानून, न्याय तथा संसदीय मामिलामन्त्री पूर्णबहादुर खड्काले संघीय ऐनहरुको प्राथमिकता तोकेर छिटोभन्दा छिटो ल्याउने बताएका छन् ।
बुधवार सिंहदरबारस्थित मन्त्रालयमा मन्त्रीको कार्यभार सम्हाल्दै मन्त्री खड्काले ऐनहरु प्राथमिकता तोकेर अगाडी बढाउने बताएका हुन् । उनले कतिपय संघीय ऐनहरु संसदमा पुगेर रोकिएका र कतिपय निर्माणकै क्रममा रहेका उल्लेख गर्दै ति सबै ऐनहरुको प्राथमिकता तोकेर काम अगाडी बढाइने बताएका हुन्।
मन्त्री खड्काले कानूनलाई पारित गर्ने सन्दर्भमा मन्त्रालयले खेल्नुपर्ने भुमिकालाई व्यवस्थित ढंगले गर्ने बताए । उनले ऐनहरु निर्माण गरेर जनताका अधिकारको कार्यान्वयन गराउनेतर्फ सरकारको ध्यान रहेको उल्लेख गरे ।
उनले प्रधानन्यायाधीश नियुक्तिको सम्बन्धमा थप आनौपचारिक छलफलको आवश्यकता परेकाले आज बसेको संवैधानिक परिषद्को बैठकले नियुक्ति प्रक्रिया अगाडी बढाउन नसकेको बताएका छन् ।
