सन्दीपलाई थप पाँच दिन थुनामा राखेर अनुसन्धान गर्न अदालतको अनुमति 

काठमाडौं, असोज २७ : नेपाली राष्ट्रिय क्रिकेट टिमका पूर्वकप्तान सन्दीप लामिछानेलाई थप पाँच दिन हिरासतमा राखेर अनुसन्धान गर्न अदालतले अनुमति दिएको छ । 

नाबालिगमाथि बलात्कारको अभियोगमा पक्राउ परेका लामिछानेलाई बिहीबार प्रहरीले काठमाडौं जिल्ला अदालत उपस्थित गराएको थियो । न्यायाधीश सूर्यप्रसाद थापाको इजलासले उनलाई थप पाँच दिन हिरासतमा राखेर अनुसन्धान गर्न अनुमति दिएको हो। 

लामिछानेका अधिवक्ता सरोजकृष्ण घिमिरेले अनुसन्धानका लागि थप पाँच दिएको म्याद पुष्टि गरे । ‘प्रहरीले सात दिनको म्याद मागेको थियो, तर हामीले सन्दीपको आधा बयान पनि सक्किसकेका कारण तीन दिन मात्र म्याद दिन श्रीमान्समक्ष आग्रह गरेका थियौं । उहाँले पाँच दिनभित्र बाँकी बयान सक्काउन प्रहरीलाई आग्रह गर्नुभएको छ,’ घिमिरेले भने । 

लामिछानेमाथि अनुसन्धान गर्न अदालतले यसअघि असोज २० गतेदेखि लागु हुनेगरी सात दिनको म्याद दिएको थियो । 

१७ वर्षीया किशोरीले लामिछानेले आफूलाई बलात्कार गरेको भन्दै गत भदौ २१ गते गौशला प्रहरी वृत्तमा जाहेरी दिएका थिए । त्यतिबेला सन्दीप क्यारेबियन लिग खेल्दै थिए । बलात्कारको आरोप लागेपछि क्यानले पनि सन्दीपलाई निलम्बन गरेको थियो । 

सन्दीप नेपाल नफर्किएपछि प्रहरीले इन्टरपोलमार्फत डिफ्युजन नोटिस जारी गराएको थियो । त्यसपछि असोज २० गते काठमाडौं आएका सन्दीप विमानस्थलबाटै पक्राउ परेका थिए । उनीमाथि प्रहरी वृत्त गौशालाले अनुसन्धान गरिरहेको छ।