दशैं अगाडीनै सकियो बैंकमा पैसा, अन्तरबैंक ब्याजदर ५.३६ प्रतिशत पुग्यो

काठमाडौं, असोज १६ : बैंक तथा वित्तीय संस्थाहरुमा दशैं अगाडीनै लगानीयोग्य रकमको अभाव भएको छ। 

बैंक तथा वित्तिय संस्थामा लगानीयोग्य रकम अभाव भएपछि अन्तर बैंक ब्याजदर बढेर ५.३६ प्रतिशत पुगेको छ । नेपाल राष्ट्र बैंकका अनुसार साउन र भदौमा सामान्य रहेको भएपनि असोजमा रकम अभाव भएपछि समस्या देखिएको हो। 

भदौ मसान्तमा अन्तरबैंक ब्याजदर ४.५ प्रतिशत थियो । भदौ १२ मा १.०६ प्रतिशत रहेको बैंकको औषत अन्तर बैंकिङ ब्याजदर एक महिनाको अवधिमा बढेर ४.३ प्रतिशत पुगेको छ । जसका कारण बैंकहरुमा तरलता अभाव निकै बढेको छ। 

असोज १५ अर्थात बिहिबार बैंकहरुको औषत अन्तर बैंकिङ ब्याजदर ५.३६ प्रतिशत पुगेको छ ।  यो अभाव दशैंपछाडी झनै बढ्न सक्ने आंकलन गरिएको छ । तरलता अभावकै कारण बैंकहरुले ऋण प्रवाहमा समेत कटौति गरिरहेका छन् । जसका कारण लगानीकर्ताहरुले ऋण पाउन झनै मुस्किल बनेको छ।