फर्किन थाले दसैंमा घर गएका यात्री (फोटो फिचर)

काठमाडौं, असोज ३१ : दसैं मान्न घर गएका काठमाडौं उपत्यका बाहिरका स्थायी बासिन्दाहरू कर्मथलो काठमाडौं उपत्यका फर्किन थालेका छन् । त्यससँगै उपत्यकामा चहलपहल बढेको छ ।

दसैंमा बन्द भएका सरकारी कार्यालयहरू आइतबारदेखि खुलेका छन् । सरकारीसँगै निजी कार्यालयहरू पनि सञ्चालनमा आएकाले उपत्यकामा सवारी साधनको शनिबारभन्दा बढेको छ । दसैंमा सुनसानप्रायः बनेको काठमाडौंमा नियमितजसो सबै प्रकारका सेवा सञ्चालनमा आएका छन् ।

प्रमुख प्रशासनिक केन्द्र सिंहदरबारमा चहलपहल बाक्लिएको छ । सबैजसो मन्त्रालयमा मन्त्री, कर्मचारी तथा आगन्तुकको बाक्लो उपस्थिति देखिन्थ्यो । विभिन्न मन्त्रालयका मन्त्री पनि कार्यालय पुगेर नियमित काममा व्यस्त देखिन्थे । सञ्चार तथा सूचना प्रविधिमन्त्री ज्ञानेन्द्रबहादुर कार्की मन्त्रालय पुगेर नियमित काममा व्यस्त रहेको उनका स्वकीय सचिव रामजी थापाले जानकारी दिए । अन्य विभागीय मन्त्री पनि नियमित काममा व्यस्त रहे ।

दसैंको टीकाको तेस्रो दिन आइतबार पनि आफन्त र मान्यजनबाट टीका र जमरा लगाई आशिर्वाद लिने क्रम जारी छ । टीकाको दिनदेखि कोजाग्रत पूर्णिमासम्म दसैंको टीका लगाउने चलन छ ।

काठमाडौं उपत्यकामा पनि दसैंको टीका लगाउन आफन्त तथा मान्यजनकहाँ पुग्ने सर्वसाधरणको आवतजावत बाक्लो देखिन्छ । उपत्यकामा औषधि, खाद्यान्न, दूध र तरकारीका पसल खुलेका छन् ।

दसैं मनाउन गाउँघर गएका सर्वसाधारणराजधानी भित्रिने क्रमसँगै कोटेश्वर, कलंकी, गोंगबु, बल्खुलगायत नाकामा भीडभाड देखिन्छ । मानिसको चहलपहल र सवारीसाधनको आवतजावत तथा बजार पसल पनि क्रमशः खुल्न थालेकाले राजधानी काठमाडौं लयमा फर्कन थालेको अनुभूति हुन्छ ।
राससको सहयोगमा