सर्वोच्च न्यायाधीशमा चुडाल र सुवेदी नियुक्त

काठमाडौं, वैशाख ६ : राष्ट्रपति विद्यादेवी भण्डारीले डा. कुमार चुडाल (झापा) र नहकुल सुवेदी (म्याग्दी) लाई सर्वोच्च अदालतका न्यायाधीशमा नियुक्त गरेकी छन्।

राष्ट्रपतिले नेपालको संविधानको धारा १२९ को उपधारा २ बमोजिम न्याय परिषद्का सिफारिशमा आज (सोमबार) उनीहरुलाई नियुक्त गरेको राष्ट्रपतिको कार्यालयका प्रवक्ता रुपनारायण भट्टराईले जारी गरेको विज्ञप्तिमा जनाइएको छ।

चुडाल हाल उच्च अदालत पाटन र सुवेदी उच्च अदालत सुर्खेतमा मुख्य न्यायाशीशका रूपमा कार्यरत छन्। उनीहरुका नामलाई संसदीय सुनुवाइ विशेष समितिले केही दिनअघि अनुमोदन गरेको थियो।