शिक्षक वा विद्यार्थीमा कोरोना संक्रमण पुष्टि भए महानगरका विद्यालय एक साता बन्द हुने

काठमाडौं, वैशाख ३ : शिक्षक वा विद्यार्थीमा कोरोना संक्रमण पुष्टि भएमा काठमाडौं महानगरपालिकाभित्रका विद्यालय एक साताका लागि बन्द गरिने भएको छ । महानगरको बिहीबार बसेको बैठकले कोरोना संक्रमण बढेकाले महानगरभित्रका विद्यालयमा  शिक्षक, विद्यार्थी वा कर्मचारी कसैमा कोरोना संक्रमण देखिए विद्यालय एक साता बन्द गर्ने निर्णय गरेको हो । 

कोरोना नदेखिएका विद्यालयमा सुरक्षका मापदण्ड अनिवार्य अपनाउन पनि महानगरले अनुरोध गरेको छ । महानगरले विद्यालयमा सामाजिक दुरी कायम गर्दै सेनिटाइजर, मास्क प्रयोग गर्न र साबुनपानीले हात धुन भनेको छ । 

स्वास्थ्य मन्त्रालयले बिहीबार नै काठमाडौंसहित १४ जिल्लालाई कोरोना संक्रमणको उच्च जोखिममा राखेको छ । मन्त्रालयले ती जिल्लाका विद्यार्थीलाई कोरोना जोखिमका कारण विद्यालय नजान अपिल गरेको थियो ।