मेलम्चीको पानी वितरणमा देखिएको समस्या समाधान गर्न ‘विशेष कार्यदल’

काठमाडौं, चैत ३१ : मेलम्ची आयोजनाको खानेपानी वितरणमा उत्पन्न समस्या समाधानका लागि विशेष कार्यदल गठन भएको छ। मंगलबार बसेको भौतिक पूर्वाधार तथा यात्रायात र खानेपानी मन्त्रालयबीचको संयुक्त बैठकले मेलम्चीको पानी वितरणमा उत्पन्न समस्या समाधान गर्न ५ जना सम्मिलित विशेष कार्यदल गठन गरेको हो।

दुई मन्त्रालयबीच भएको संयुक्त बैठकमा भौतिक पूर्वाधार तथा यात्रायातमन्त्री वसन्त नेम्वाङ र खानेपानीमन्त्री मणिचन्द्र थापा पनि उपस्थित थिए। मेलम्चीको पानी वितरण गर्दा काठमाडौं उपत्यकाको सडकमा परेको समस्या समाधान गर्न कार्यदल गठन गरिएको हो ।

गत १५ गतेदेखि काठमाडौं उपत्यकामा मेलम्चीको पानी वितरण गर्न थालिएको थियो । तर, पुरानो पाइपलाइनमा पानी पठाउँदा उपत्यकाका विभिन्न स्थानमा पानीको पाइप फुटेर सडकमा क्षति पुगेको छ।

कार्यदलले भोलिदेखि नै काम अगाडि बढाउने बताइएको छ।