फेरि अघि बढ्यो विद्युतीय बस खरिद प्रक्रिया

काठमाडौं, चैत ३० : विद्युतीय बस खरिद प्रक्रिया फेरि अघि बढेको छ। यसका लागि सरकारले साझा यातायात सहकारी प्रालिलाई आवश्यक कागजात उपलब्ध गराएको छ।

संस्थामार्फत नै विद्युतीय बस खरिद गरेर सञ्चालन गर्न सरकारले दुई वर्ष अघि साझाका सेयर खरिद गरेको थियो। त्यतिबेला बस कस्तो हुने भन्ने विवरणलगायत विषयमा समस्या आउँदा सरकारले साझालाई दिइएको रकम फिर्ता लिने निर्णय गरेको थियो।

सेयर रकम फिर्ता नभएको र सोही रकमबाट अहिले बस खरिद गरेर सञ्चालन गर्ने योजना बनाइएको भौतिक पूर्वाधार तथा यातायात मन्त्रालयका प्रवक्ता दीपक भट्टराईले बताए। “अहिले पुनः बस खरिदका लागि प्रक्रिया अघि बढिरहेको छ, उनले भने।

सरकारले २०७५ सालमा संस्थालाई ३ सय विद्युतीय बस खरिदका लागि तीन अर्ब बराबरको सेयर खरिद गरेको थियो। त्यतिबेला स्फेसिफिकेसन, ठेक्का कागजात बनाउनेलगायत प्राविधिक समस्या भएको प्रवक्ता भट्टराईले बताए। अहिले मन्त्रालयले आवश्यक सबै कागजात तयार गरेर संस्थालाई उपलब्ध गराएको छ।  

सरकारले बस खरिद पुनः अघि बढाउन भनेसँगै संस्थाले पनि खरिद प्रक्रिया अघि बढाइएको छ। संस्थाले ४० बस खरिदका लागि ठेक्का आह्वान गरेको छ।

सार्वजनिक यातायातमा सरकारको प्रत्यक्ष लगानी नभए पनि सबैभन्दा बढी सरकारको सेयर रहेको संस्थाका रुपमा रहेको छ । सङ्घीय सरकार मात्रै होइन, काठमाडौँ उपत्यकाका स्थनीय तहले पनि साझाको सेयर खरिद गरेका छन्। (रासस)