माओवादी केन्द्रको संसदीय दलको नेतामा भरत साह

जनकपुरधाम, चैत २८ : नेकपा माओवादी केन्द्रले प्रदेश २ को संसदीय दलको नेतामा  भरत साहलाई चयन गरेको छ ।

पार्टी कार्यालयमा बसेको बैठकले दलको नेतामा साहलाई चयन गरेको हो । यस्तै, उपनेतामा जगतप्रसाद यादव, प्रमुख सचेतकमा दिलिप साह, सचेतकमा रुवी कर्णलाई चयन गरिएको छ । 

पार्टीको प्रदेश २ मा ११ जना प्रदेश सभा सदस्य रहेका छन । जसमा चार जना नेकपा एमालेमा गएका छन ।

तत्कालीन नेकपा एमालेसँग एकीकरण हुनुअघि माओवादीको दलको नेतामा रामचन्द्र मण्डल थिए । तर ५ पुसमा प्रधानमन्त्री केपी शर्मा ओलीले प्रतिनिधि सभा विघटन गरेपछि मण्डल ओली समूहमा लागेका थिए ।  

संसदीय दलको नेता चयन भएका साहले चार जना  प्रदेश सभा सदस्यलाई स्ष्टीकरण सोध्ने निर्णय गरिएको बताए । प्रदेश सभा सदस्यहरु रामचन्द्र मण्डल, ज्वाला साह, मो.समिर ,कुन्दन कुशवाहालाई स्पष्टीकरण सोध्न लागिएको हो । उनीहरु पार्टीमा नफर्किएमा प्रदेश सभा सदस्य खारेज गर्ने बताइएको छ ।

प्रदेशको पाँचौ अधिवेसनको पहिलो बैठक चैत ३० गते  बोलाइएको छ ।