नख्खुमा बर्ड फ्लु देखियो, डेढ हजार बढी पशुपक्षी नष्ट

ललितपुर, चैत १६ : ललितपुर महानगरपालिका-१४ को नख्खुमा कृषकले पालेका पशुपक्षीमा बर्ड फ्लु देखिएको छ।

पशु सेवा विभागका सूचना अधिकारी डा. चन्द्र ढकालले नख्खुमा रहेका कृषकले पालेका हाँस, कुखुरा, बट्टाईको नमूना केन्द्रीय पशुपक्षी रोग अन्वेषण प्रयोगशाला, त्रिपुरेश्वरमा पीसीआर परीक्षण गर्दा बर्डफ्लु रोग देखिएको बताए।

नेपालमा यसवर्ष बर्ड फ्लु रोग देखिएको यो छैटौँ पटक हो। यसअघि सुर्खेत, जाजरकोट तथा काठमाडौंको तारकेश्वरको तीन ठाउँ बर्डफलु देखिएको थियो।

बर्ड फ्लु रोग पुष्टि भएको क्षेत्रबाट रोग अन्यत्र फैलिन नदिन त्यहाँ रहेका पशुपक्षीलाई तत्काल नियन्त्रणमा लिनका लागि सङ्घ, प्रदेश र स्थानीय तहबाट दक्षजनशक्ति परिचालन गरिएको र त्यस क्षेत्रलाई पूर्ण निःसङ्क्रमणसमेत गरिसकेको डा. ढकालले बताए।

नख्खु क्षेत्रका ५१६ हाँस, ८५४ स्थानीय कुखुरा, १५४ बट्टाई, ९४४ वटा अण्डा, ३३५ केजी दाना नष्ट गरिएको छ।