म्यानमारमा संविधान संशोधन गरेर प्रदर्शन नियन्त्रण गर्दै सैन्य सरकार
म्यानमार, फागुन ३ : म्यानमारमा सेनाले संविधान संशोधन गरेर प्रदर्शनकारीलाई पक्राउ गर्दै आन्दोलन नियन्त्रणमा लिने प्रयास गरेको छ । सैनिक ‘कू’ र आङ सान सुकीलगायतलाई नजरबन्द राखिएको विरोधमा जारी जनप्रदर्शन नियन्त्रण गर्न सेनाले संविधान संशोधन गरेको हो।
सैन्य सरकारले संविधान संशोधन गरेर बिनापक्राउ पुर्जी घर तलासी र पक्राउ गर्ने अधिकार सेनालाई दिएको छ । सेनाले अदालतको आदेशबिना २४ घण्टासम्म जो कोहीलाई थुनामा राख्न सक्छ।
त्यस्तै, सेनाले सरकारविरुद्ध लाग्न जनतालाई उक्साएको र शान्ति भंग गरेको आरोपमा सात प्रख्यात कलाकार र नेसनल लिग फर डेमोक्रेसीका कार्यकर्तालाई पक्राउ गर्न आदेश दिएको छ । गायक लिन लिन, इन्सेन आंग सोइ, जस्ट सोसाइटी बायडा इन्स्टिच्युटका निर्देशक मायो यान नौंग थेइन, उद्घोषक मौंग मौंग आई र फेसबुक सेलिब्रिटी ई पेन्सिलो सामिललाई पक्राउ गर्न आदेश दिएको हो ।
त्यस्तै अमेरिकी दूतावासले आफ्ना नागरिकलाई सडकमा ननिस्कन आग्रह गरेको छ । सैन्य सरकारले पाहुनाको रिपोर्ट वडामा अभिलेख राख्नसमेत निर्देशन दिएको छ।
रायटर रिपोर्टका अनुसार देशका केही भागमा ट्रेन सेवा ठप्प भएको छ । आन्दोलनका कारण कर्मचारीले काम गर्न अस्वीकार गरेपछि ट्रेन सेवा अवरोध भएको हो । त्यस्तै, रेलका कर्मचारी सेनाका प्रमुख जनरलको आदेश अवज्ञा गर्दै यांगुनमा आयोजित प्रदर्शनमा सहभागी भएका थिए।
