प्रधानमन्त्रीको दाबी– अर्को वर्ष १० प्रतिशत आर्थिक वृद्धि

काठमाडौं, फागुन ३ : मुलुकको आर्थिक वृद्धिमा दोहोरो अंक हासिल गर्ने पुरानै लक्ष्य हो, जुन हालसम्म प्राप्त भएको छैन ।

प्रधानमन्त्री केपी ओलीले भने आगामी आर्थिक वर्षमै दोहोरो अंकको वृद्धि हासिल गर्ने दाबी गरेका छन् ।

आफ्नो तीन वर्षे कार्यकालमा भएका कामको फेहरिस्त सुनाउन सोमबार सिंहदरबारमा आयोजित पत्रकार सम्मेलनमा प्रधानमन्त्रीले ओलीले आगामी आवमा १० प्रतिशत आर्थिक वृद्धि हासिल हुने दाबी गरेका हुन् ।

तीन वर्षमा साढे पाँच प्रतिशतको आर्थिक वृद्धि हासिल भएको उनको दाबी छ । प्रदेशहरूको आर्थिक वृद्धि ६ प्रतिशतभन्दा माथि रहेको प्रधानमन्त्रीको दाबी छ । ‘कोभिडले विश्वभरको अर्थतन्त्र भत्कायो तर सरकारको सुझबुझ र पूर्वसक्रियताका कारण नेपाली अर्थतन्त्रमा खासै प्रभाव परेन,’ प्रधानमन्त्रीले भने, ‘पुनः उच्च आर्थिक वृद्धिको बाटोमा अर्थतन्त्र छ । आगामी वर्ष १५ औँ योजनाले प्रक्षेपण गरेको १० प्रतिशत आर्थिक वृद्धि हासिल हुनेछ ।’

कोभिड–१९ पनि गरिबी नबढेको प्रधानमन्त्रीले दाबी गरे । अनि प्रतिव्यक्ति आय ८ सय ८७ बाट १ हजार ९७ डलर पुगेको दाबी प्रस्तुत गरे । ‘नेपाल अति कम विकसित मुलुकबाट विकासशील मुलुकमा स्तरोन्नती हुँदैन,’ प्रधानमन्त्रीले भने ।