कुटपिट गरी हत्या गरेको अभियोगमा दुई जना पक्राउ

बारा, फागुन १ : कुटपिट गरी महिलाको हत्या गरेको अभियोगमा दुई जना पक्राउ परेका छन् । महागढीमाई नगरपालिका–१ बस्ने कान्तिदेवी कुशवाहाको कुटपिट गरी हत्या गरेको अभियोगमा दुई जना पक्राउ परेका हुन् ।

पक्राउ पर्नेहरुमा महागढीमाई नगरपालिका–१ बरियापुर कचहरी टोल बस्ने ४२ वर्षीय लालबाबु प्रसाद कुशवाहा र सोही ठाउँ मठवा टोल बस्ने ४८ वर्षीया धनेश्वरी देवी कुशवाहा रहेका छन् । उनीहरुमध्ये लालबाबुलाई बिहीबार र धनेश्वरीलाई शुक्रबार प्रहरीले पक्राउ गरेको हो ।  

कान्तिदेवी आफ्नै घरमा माघ २५ गते राति मृत अवस्थामा फेला परेको घटनाको अनुसन्धानको क्रममा मृतकका परिवार र धनेश्वरीबीच जग्गालगायत विविध विषयमा विवाद रहेकाले अपराधिक प्रवृत्तिका लालबाबुलाई परिचालन गराई कान्तीदेवीको हत्या गराएको खुल्न आएको छ । 

पक्राउ परेका लालबाबु यसअघि २०५६ देखि २०६१ सालसम्म ३ वटा डाँका मुद्दा, १ वटा हातहतियार खरखजना मुद्दा र १ वटा केही सार्वजनिक अपराध मुद्दामा समेत पक्राउ परी सजाय भोगेको खुल्न आएको जिल्ला प्रहरी कार्यालय कलैया बाराले जनाएको छ ।