नियुक्ति सिफारिस  फिर्ता गर्ने अधिकार सभामुखलाई नभएकाे तिमिल्सिनाकाे दाबी

काठमाडौं, माघ १९ : राष्ट्रिय सभाका अध्यक्ष गणेशप्रसाद तिमिल्सिनाले संसदीय सुनवाइका लागि संवैधानिक परिषद्ले गरेको नियुक्ति सिफारिस  फिर्ता गर्ने अधिकार संघीय संसद्का  सभामुख अग्निप्रसाद सापकोटालाई नभएको दाबी गरेका छन् । तिमिल्सिनाले आज प्रेस नोट जारी गरेर सभामुखलाई संवैधानिक परिषद्ले गरेको नियुक्ति सिफारिस  फिर्ता गर्ने अधिकार नभएकाे दाबी गरेका हुन् ।

‘संवैधानिक परिषद्ले गरेको सिफारिस संसदीइ सुनवाइ समितिको दुई तिहाइबाहेका अन्य कुनै पनि निकाय वा पदाधिकारीलाई अस्वीकार वा फिर्ता गर्ने कानुनी व्यवस्था छैन,’ तिमिल्सिनाकाे  प्रेस नोटमा उल्लेख छ ।

तिमिल्सिनाले संवैधानिक परिषद्का सिफारिसहरु सभामुख सापकोटाको एकल निर्णयले फिर्ता पठाएकामा गम्भीर आपत्ति प्रकट गरेका छन् ।

हिजाे सभामुख सापकोटाले संवैधानिक परिषद्ले गरेको नियुक्ति सिफारिसविरुद्ध सर्वोच्चमा मुद्दा विचाराधीन रहेको भन्दै संवैधानिक परिषद्मै नियुक्ति सिफारिस  फिर्ता पठाएका थिए ।