नक्कली देशभक्तले देशलाई अस्थिरतातर्फ धकेल्न खोजे : प्रधानमन्त्री

काठमााडौं, माघ १५  : प्रधानमन्त्री केपी शर्मा ओलीले  नक्कली देशभक्तले देशलाई अस्थिरतातर्फ धकेल्न खोजेको बताएका छन् । उनले  आज नेपाल ट्रेड युनियन महासंघको राष्ट्रिय कार्यकर्ता भेलामा सम्बोधन गर्दै नक्कली देशभक्तले बहुमत प्राप्त सरकार ढालेर जोरजामको सरकार बनाउने दाउ रच्दै देशलाई अस्थिरतातर्फ धकेल्न खोजेको बताएका हुन् ।

उनले नक्कली देशभक्तको समूहले सरकार ढालेर भागबन्डाको खेल सुरु गर्न लागेकाले  जनताकहाँ जानुपरेको बताए । उनले भने, ‘हामीले देशलाई अस्थिरतातर्फ जानबाट रोकेका छौँ ।  जनताले सक्कली देशभक्तलाई समर्थन गर्छ कि नक्कल देशभक्तलाई ?’

उनले नेकपा दाहाल–नेपाल समूहमाथि व्यंग्य गर्दै भने,  ‘बहुमत प्राप्त सरकारलाई कामै गर्न नदिने ? अहिले स्थायित्वको कुरा गर्दै हुनुहुन्छ । बहुमत प्राप्त सरकार ढाल्नै पर्ने ।’  

उनले केही नेता र पत्रिकाले सरकारको खेदो खनेको गुनासाे गरे । उनले भने, ‘केही नेताले सरकारको पक्षमा कहिल्यै बोलेनन् ।  केही सञ्चार माध्यमले सरकारको राम्रो कामको केहीले प्रचार गरेनन् ।’  

उनले दाहाल–नेपाल समूहले पार्टी सञ्चालन गर्न नसक्ने दाबीसमेत  गरे  । उनले दाहाल–नेपाल समूह  नागरिक अगुवा हुने दावी गर्दै भने, ‘तीन महिनामा लाग्छ, उनीहरु त्यही पुग्छन् ।’