तरुण दलका कार्यकर्ता हत्याको आरोपमा वडाअध्यक्षसहित चार जना पक्राउ

काठमाडौं, माघ १४ : विद्यालय व्यवस्थापन समितिको चुनावको विवादमा खुँडा प्रहार गरी युवकको हत्या गरेको आरोपमा प्रहरीले चार जनालाई पक्राउ गरेको छ। 

नेपाल तरूण दल बझाङ छबिसपाथिभरा गाउँपालिका ३ का अमृत सिंहमाथि खुँडा प्रहार गरी हत्या गरेको आरोपमा वडा अध्यक्षसहित चार जना पक्राउ परेका हुन्।

पक्राउ पर्नेमा नेपाल कम्युनिष्ट पार्टी (नेकपा)बाट निर्वाचित वडा नम्बर ३ का वडाध्यक्ष विकास ऐडी, ज्ञानबहादुर कडायत, प्रकाश ऐडी र केदार ऐडी रहेका छन्। 

स्थानीय बन्नीचौर माध्यमिक विद्यालयको विद्यालय व्यवस्थापन समितिको मंगलबार भएको निर्वाचन सकेर घर फर्कंदै गर्दा सिंहमाथि खुँडा प्रहार भएको थियो।

विद्यालयमा नेकपा र नेपाली कांग्रेस समर्थित गरी दुई समूह चुनावमा थियो। कांग्रेस पक्षले चुनाव जितेपछि नेकपाले आक्रमण गरेको बताइएको छ।

प्रहरीले घटनास्थलबाट खुँडा पनि बरामद गरेको छ।